وزیر اعظم نواز شریف کی جانب سے پاکستانی افواج شام، بحرین یا کسی اور ملک میں نہ بھیجنے کے اعلان کا مجھ سمیت پوری قوم تہہ دل سے خیر مقدم کرتی ہے۔ الطاف حسین

لندن۔۔۔20، مارچ2014ء

متحدہ قومی موومنٹ کے قائد جناب الطاف حسین نے کہاہے کہ وزیراعظم پاکستان میاں محمدنوازشریف نے پاکستان ایئرفورس بیس میانوالی کوقومی ہیرو ایم ایم عالم بیس کا نام دینے کی تقریب سے جوخطاب کیاہے اس کا مجھ سمیت پوری پاکستانی قوم تہہ دل سے خیرمقدم کرتی ہے۔ اپنے ایک بیان میں جناب الطاف حسین نے کہاکہ اس وقت پاکستان سمیت جوجو ممالک مسائل کاشکارہیں اوربے یقینی کی کیفیت میں مبتلاہیں ان تمام ممالک کو ایک ایسی باوقار اورنڈرلیڈرشپ کی ضرورت ہے جوان ممالک کے عوام کے خدشات اورذہنی پریشانیوں کاواضح اوردوٹوک الفاظ میں اظہارکرے تاکہ قوم کے افرادکی تسلی وتشفی ہوسکے۔جناب الطاف حسین نے کہاکہ مجھے خوشی ہے کہ آج وزیراعظم پاکستان نے اپنے خطاب میں قوم کو بتایا کہ پاکستانی افواج نہ توشام ،نہ بحرین اورنہ ہی کسی اورملک میں بھیجی جارہی ہیں۔ وزیراعظم نے واضح اوردوٹوک الفاظ میں یہ اعلان کرکے پاکستانی قوم میں پائی جانے والی بے چینی،ذہنی پریشانی اوربے یقینی کی کیفیت کاخاتمہ کردیاہے اوراس سے عوام کے اعتمادمیں بھی اضافہ ہواہے جس پر میں وزیراعظم کوخراج تحسین پیش کرتا ہوں ۔ انہوں نے کہاکہ اس وقت پاکستان سمیت مسائل ومشکلات کاشکار تمام ممالک اوراقوام کواسی جرات اظہار اور دوٹوک مؤقف کی ضرورت ہے۔ جناب الطاف حسین نے کہاکہ میں دعاگوہوں کہ اللہ تعالیٰ، وزیراعظم میاں نوازشریف کومستقبل میں بھی اسی طرح قو م کے مفادمیں جرات مندانہ فیصلے کرنے اورعوام میں ان کااظہارکرنے کاحوصلہ اورتوفیق عطاکرے ۔(آمین ، ثمہ آمین)