دبئی میں ایم کیوایم کے ڈپٹی کنوینر ندیم نصرت کی سابق صدرآصف علی زرداری سے ملاقات
گورنر سندھ ڈاکٹر عشرت العباد اور سینیٹر رحمان ملک بھی ملاقات میں موجود تھے
ندیم نصرت نے آصف علی زرداری کو قائد ایم کیوایم الطاف حسین کی جانب سے خیرسگالی کاپیغام پہنچایا
آصف علی زرداری نے بھی جناب الطاف حسین کیلئے نیک خواہشات اور خیرسگالی کے جذبہ کااظہار کیا
ملاقات میں بین الاقومی حالات، پاکستان کی موجودہ سیاسی ومعاشی صورتحال ، صوبہ سندھ میں امن وامان اور سیاسی ہم آہنگی سمیت دیگر امور پر تبادلہ خیال
وفاق کی خواہش ہے کہ صوبہ میں تمام سیاسی قوتوں کے درمیان اتحاد واتفاق اورمفاہمت کی فضاء فروغ پائے، گورنرسندھ
عوام کی فلاح وبہبود کیلئے مفاہمتی عمل جاری رہے گا اور اس سلسلے میں سیاسی تعاون مزید بڑھایاجائے گا، آصف علی زرداری
دبئی ۔۔۔16، مارچ2014ء
متحدہ قومی موومنٹ کی رابطہ کمیٹی کے ڈپٹی کنوینر ندیم نصرت اور گورنرسندھ ڈاکٹر عشرت العباد نے آج دبئی میں سابق صدرپاکستان اور پیپلزپارٹی کے شریک چیئرپرسن جناب آصف علی زرداری سے تفصیلی ملاقات کی ۔ اس موقع پر پیپلزپارٹی کے رہنماء سینیٹر رحمان ملک بھی ان کے ہمراہ تھے ۔ ملاقات خوشگوار ماحول میں ہوئی جس میں بین الاقومی حالات، پاکستان کی موجودہ سیاسی ومعاشی صورتحال ، صوبہ سندھ میں امن وامان اور سیاسی ہم آہنگی سمیت دیگر امور پر تبادلہ خیال کیا گیا۔
رابطہ کمیٹی کے ڈپٹی کنوینر ندیم نصرت نے آصف علی زرداری کو قائد تحریک جناب الطاف حسین کا خیرسگالی کا پیغام پہنچایا جس پر جناب آصف علی زرداری نے بھی جناب الطاف حسین کیلئے نیک خواہشات اور خیرسگالی کے جذبہ کااظہار کیا۔ گورنر سندھ ڈاکٹر عشرت العباد نے گفتگو کرتے ہوئے کہاکہ وفاق کی خواہش ہے کہ صوبہ میں تمام سیاسی قوتوں کے درمیان اتحاد واتفاق اور ہم آہنگی ہو، مفاہمت کی فضاء فروغ پائے، دیرپا امن قائم ہو اور اس سلسلے میں تمام سیاسی قوتوں کے درمیان باہمی رابطوں اور تعاون کا سلسلہ جاری رہنا چاہیے۔ آصف علی زرداری نے کہاکہ ملک کو درپیش چیلجنز سے نمٹنے ، ملک اورصوبہ سندھ کی ترقی اورعوام کی فلاح وبہبود کیلئے مفاہمتی عمل جاری رہے گا اور اس سلسلے میں سیاسی تعاون مزید بڑھایاجائے گا۔