وزیر اعظم پاکستان اور وزیر اعلیٰ پنجاب نرسوں کے مطالبات تسلیم کریں، الطاف حسین

لندن۔۔۔16، مارچ2014ء

متحدہ قومی موومنٹ کے قائد جناب الطاف حسین نے وزیر اعظم پاکستان میاں محمد نواز شریف اور وزیر اعلیٰ پنجاب میاں محمد شہباز شریف سے پرزور مطالبہ کیا ہے کہ نرسوں کے مطالبات تسلیم کیے جائیں ۔ ایک بیان میں جناب الطاف حسین نے کہاکہ طب کے مقدس پیشہ سے وابستہ نرسیں اپنے جائز مطالبات اور حقوق کیلئے گزشتہ کئی دنوں سے صبح سے لیکر رات تک احتجاج کررہی ہیں اور مسلسل احتجاجی مظاہروں کے باعث متعدد نرسیں شدید علیل ہوچکی ہیں جنکی حالت انتہائی تشویشناک ہے ۔ انہوں نے اس امرپر انتہائی حیرت اور افسوس کااظہار کرتے ہوئے کہا کہ پنجاب حکومت کی جانب سے نرسوں کے مطالبات نجانے کن وجوہات کی بنیاد پر مسلسل نظرانداز کیاجارہا ہے جبکہ قوم کی یہ بیٹیاں مختلف اسپتالوں میں نہ صرف مریضوں کی تیمارداری ،خدمت اور علاج ومعالجہ کرتی ہیں بلکہ ہنگامی صورتحال میں انتہائی محنت، لگن اور جانفشانی سے کئی کئی دن بلاناغہ بھی کام کرتی ہیں ۔ 

جناب الطاف حسین نے وزیراعظم اور وزیراعلیٰ پنجاب کو مخاطب کرتے ہوئے کہاکہ یہ صرف قوم کی بہن بیٹیاں ہی نہیں ہیں بلکہ آپ کی بہن بیٹیاں بھی ہیں اورنرسوں کے مسائل کوحل کرنا حکومت کی بنیادی ذمہ داری ہے ۔ خدارا!! نرسوں کے مطالبات پر ہنگامی بنیادوں پر توجہ دی جائے ،وزیراعظم اوروزیراعلیٰ پنجاب خودمداخلت کرکے تمام ترصورتحال کاجائزہ لیں ، محنت ولگن اور جانفشانی سے کام کرنے والی نرسیں جوکہ اپنے گھربار اورآرام کی قربانیاں دیکر دکھی انسانیت کی خدمت میں مصروف ہیں ، ان کے مسائل پر سنجیدگی سے غورکریں اور ان کے مطالبات تسلیم کریں ۔ جناب الطاف حسین نے کہاکہ اگروزیراعظم پاکستان اور وزیراعلیٰ پنجاب کی جانب سے نرسوں کے مطالبات پر فی الفور توجہ نہ دی گئی نرسوں کی احتجاجی تحریک صوبہ پنجاب سے نکل کر پاکستان کے چپے چپے میں پھیل جائے گی اور ایم کیوایم ، ہرجگہ احتجاجی مظاہرہ کرنے والی نرسوں کے شانہ بشانہ ہوگی ۔ جناب الطاف حسین نے حقوق کیلئے احتجاجی مظاہرہ کرنے والی نرسوں پر پولیس تشدد اورلاٹھی چارج کی سخت ترین الفاظ میں مذمت کی ،پولیس تشددسے زخمی اور مسلسل احتجاجی مظاہروں کے باعث علیل ہونے والی نرسوں کی جلد ومکمل صحت یابی کیلئے دعا بھی کی ۔