نرسوں کو بہیمانہ تشدد کانشانہ بنانے کے واقعہ کا فوری نوٹس لیا جائے ، رابطہ کمیٹی

کراچی ۔۔۔14،مارچ2014ء

متحدہ قومی موومنٹ کی رابطہ کمیٹی نے لاہور میں پنجاب اسمبلی کے باہر احتجاجی مظاہرہ کرنے والی نرسوں پر پولیس کے لاٹھی چارج کی شدیدالفاظ میں مذمت کی ہے ۔ ایک بیان میں رابطہ کمیٹی نے کہاکہ ایک مہذب اور مقدس پیشہ سے وابستہ نرسوں کو حقوق سے محروم رکھنا اور حقوق کی آواز بلند کرنے پر نرسوں کوپولیس کی جانب سے لاٹھی چارج اور بہیمانہ تشدد کانشانہ بناناخواتین کے بنیادی حقوق کی سنگین خلاف ورزی ہے ۔ رابطہ کمیٹی نے گورنر پنجاب محمد سرور اور وزیراعلیٰ پنجاب میاں شہباز شریف سے مطالبہ کیا کہ نرسوں کو بہیمانہ تشدد کانشانہ بنانے کے واقعہ کا فوری نوٹس لیا جائے ، تشدد میں ملوث پولیس اہلکاروں کے خلاف قانونی کارروائی کی جائے اورنرسوں کے جائز مطالبات تسلیم کیے جائیں۔