پنجاب اسمبلی کے باہر اپنے مطالبات کے حق میں احتجاج کرنے والی ایڈہاک خواتین نرسوں پر پولیس کے بلاوجہ لاٹھی چارج پر حق پرست اراکین قومی اسمبلی کا اظہار مذمت

کراچی ۔۔۔14، مارچ2014ء 

متحدہ قومی موومنٹ کے اراکین قومی اسمبلی نے پنجاب اسمبلی کے باہر اپنے مطالبات کے حق میں احتجاج کرنے والی ایڈہاک خواتین نرسوں پر پولیس کے بلاوجہ لاٹھی چارج کی سخت ترین الفاظ میں مذمت کی ہے اور اس عمل کو خواتین اور لیبر قوانین کے بنیادی حقوق کی سنگین خلاف ورزی قرار دیا ہے ۔ اپنے مشترکہ بیان میں انہوں نے کہاکہ پنجاب اسمبلی کے باہر خواتین نرسوں پر پولیس کا بہیمانہ تشدد اور انہیں حراست میں لینا نہ صرف قابل مذمت ہے بلکہ طب کے معزز پیشے کی تذلیل اور توہین ہے ۔ حق پرست اراکین قومی اسمبلی نے وزیراعظم نواز شریف اور وزیر اعلیٰ شہباز شریف سے مطالبہ کیا کہ پنجاب اسمبلی کے باہر پرامن احتجاج کرنے والی ایڈہاک خواتین نرسوں کے مسائل کو ٹھنڈے دل سے سناجائے ،ان کے جائز مطالبات تسلیم کئے جائیں ، حراست میں لی گئیں خواتین نرسوں کو فی الفور رہا کیاجائے اور لاٹھی چارج میں ملوث پولیس اور انتظامیہ کے خلاف سخت ترین کارروائی عمل میں لائی جائے ۔