پشاور کے بھٹہ تل بازار میں خود کش بم دھماکہ اور فائرنگ کے واقعہ پر الطاف حسین کااظہار مذمت

لندن۔۔۔14مارچ2014ء

متحدہ قومی موومنٹ کے قائد جناب الطاف حسین نے پشاور کے علاقے سربند کے بھٹہ تل بازار میں خود کش بم دھماکہ اوردہشت گردوں کی فائرنگ کی سخت ترین الفاظ میں مذمت کی ہے اور بم دھماکے اور فائرنگ کے نتیجے میں پولیس اہلکاروں سمیت متعدد افراد کے شہید اور زخمی ہونے پر گہرے دکھ اور افسوس کااظہار کیا ہے ۔ ایک بیان میں انہوں نے کہاکہ حکومت اور دہشت گردوں کے درمیان مذاکرات کے باوجود پشاور کے بازار میں بم دھماکہ اور فائرنگ کا واقعہ نہ صرف افسوسناک ہے بلکہ مذاکرات پر سوالیہ نشان بھی ہے۔ انہوں نے کہاکہ پشاور کے بازار میں خود کش بم دھماکہ اور فائرنگ کا واقعہ کھلی دہشت گردی ہے لیکن حکومت اور دہشت گردوں کے درمیان اب بھی مذاکرات کاکھیل ملک و قوم کی سلامتی کو داؤ پر لگانے مترادف ہے ۔ انہوں نے بم دھماکے میں پولیس اہلکاروں سمیت دیگر شہید ہونے والے افراد کے تمام سوگوار لواحقین سے دلی تعزیت وہمدردی کااظہار کرتے ہوئے شہداء کے بلند درجات اور زخمیوں کی جلد ومکمل صحتیابی کیلئے دعا بھی کی ۔ جناب الطاف حسین نے صدر مملکت ممنون حسین ، وزیراعظم نواز شریف اور وفاقی ویر داخلہ چوہدری نثار سے مطالبہ کیا کہ پشاور کے بھٹہ تل بازار میں خود کش بم دھماکہ اور فائرنگ کے واقعہ میں ملوث سفاک دہشت گردوں کو فی الفور گرفتار کیاجائے ، خودکش بم دھماکہ اور فائرنگ کی بد ترین کارروائی کرکے مذاکراتی عمل کی خلاف ورزی کا سنجیدگی سے نوٹس لیاجائے اور حکومت مذاکرات کا کھیل بند کرکے دہشت گردوں کے خلاف سخت ترین کارروائی کرے اور عوام کی جان و مال کا تحفظ ہر قیمت پر یقینی بنائے۔