جناب الطاف حسین کی تقریر کے خلاف پنجاب اسمبلی میں قرار داد پیش کرنے اور اسے منظور کرنے والے معزز اراکین سے رابطہ کمیٹی کا اظہار تشکر

لندن ۔۔11مارچ 2014ء 

متحدہ قومی موومنٹ کی رابطہ کمیٹی نے پنجاب اسمبلی میں قائد تحریک جناب الطاف حسین کی تقریر کے خلاف قرار داد کا کھلے دل سے خیر مقدم کیا ہے ۔ایک بیان میں رابطہ کمیٹی نے جناب الطاف حسین کی تقریر کے خلاف قرار داد پیش کرنے اور اسے منظور کرنے والے معزز اراکین کا شکریہ ادا کر تے ہوئے کہا کہ ایم کیوایم کی مخالفت کاعمل بھی ملک بالخصوص صوبہ پنجاب میں حق پرستانہ پیغام کے فروغ میں اہم کر دار اد کرے گا ۔ رابطہ کمیٹی نے کہا کہ پنجاب اسمبلی میں قائد تحریک جناب الطاف حسین کی تقریر کے خلاف قرا ردادمنظور کرنا چند جاگیر دارانہ اور وڈیرانہ ذہنیت رکھنے والوں کا فیصلہ ہے جبکہ پنجاب کے غریب ہاری ، کسان اور محنت کش طبقہ ایم کیوایم اور جناب الطاف حسین کے ساتھ ہے ۔رابطہ کمیٹی نے کہا کہ ایم کیوایم کا حق پرستانہ فکر وفلسفہ تیزی سے ملک بھر کے غریب ومتوسط طبقہ کے عوام میں پھیل رہا ہے ۔عوام میں شعوری بیداری جنم لے رہی ہے انشاء اللہ بہت جلد ملک سے فرسودہ جاگیر دارانہ نظام کا خاتمہ ہوگا اور ملک میں غریب ومتوسطہ طبقہ کی حکمرانی قائم ہوگی ۔