لندن میں ایم کیوایم کے قائد الطاف حسین کی صاحبزادی افضاء الطاف کی بارہویں سالگرہ کی تقریب دعائیہ تقریب میں بدل دی گئی

لندن۔۔۔6 مارچ 2014ء

ایم کیوایم کے قائد جناب الطاف حسین کی صاحبزادی افضاء الطاف کی بارہویں سالگرہ کی تقریب انتہائی سادگی سے منعقدہوئی جسے دعائیہ تقریب میں تبدیل کردیا گیا۔ تقریب میں ایم کیوایم کے قائدجناب الطاف حسین ، رابطہ کمیٹی کے ڈپٹی کنوینر ندیم نصرت، دیگراراکین رابطہ کمیٹی، پاکستان سے آئے ہوئے ارکان قومی وصوبائی اسمبلی شیخ صلاح الدین، عدنان احمد، سیف الدین خالد، انٹرنیشنل سیکریٹریٹ کے ارکان، ان کے اہل خانہ اور بچوں نے شرکت کی ۔ اس موقع پرگفتگو کرتے ہوئے جناب الطاف حسین نے کہاکہ پاکستان میں گزشتہ چنددنوں کے دوران ایم کیوایم کے کارکنوں کے تسلسل کے ساتھ ہونے والے شہادت کے واقعات اور دارالحکومت اسلام آبادمیں ایف ایٹ کچہری میں دہشت گرد ی کے واقعہ میں جج اوروکلاء سمیت متعددافرادکی شہادت کے سانحہ پر میں نے کارکنوں کویہی ہدایت کی تھی کہ وہ میری بیٹی افضاء کی سالگرہ کوشہیدوں کے ایصال ثواب، پاکستان سے دہشت گردی کے خاتمے اورملک کی ترقی وخوشحالی کیلئے دعائیہ اجتماعات میں بدل دیں۔ہم نے لندن میں بھی سالگرہ کی تقریب کو دعائیہ اجتماع میں بدل دیاہے ۔ اس موقع پر جناب الطاف حسین نے ایم کیوایم کے شہید کارکنوں اوردہشت گردی کے واقعات میں شہید ہونے والے فوج، ایف سی، رینجرز، پولیس اوردیگراداروں سے تعلق رکھنے افسروں، جوانوں اورشہریوں کے ایصال ثواب کیلئے فاتحہ خوانی بھی کرائی ۔ انہوں نے کہا کہ ہماری دعا اور کوشش ہے کہ پاکستان سے دہشت گردی کا خاتمہ ہو ، ملک میں امن وسلامتی ہو،ترقی وخوشحالی ہو،تمام شہری امن وسکون سے اپنی زندگی گزاریں اورتمام لوگوں کے چہروں پرخوف کے بجائے اطمینان و سکون اور مسرت ہو۔