لاہور میں نومارچ کو ہونیوالی صوفیائے کرام کانفرنس میں اہل پنجاب زیادہ سے زیادہ تعداد میں شرکت کرکے اپنی قومی ذمہ داری کو پورا کریں اور صوفیائے کرام کی تعلیمات اور پیغام کے فروغ کیلئے اپنا حصہ ضرور ڈالیں، رکن قومی اسمبلی آصف حسنین

گجرانوالہ۔۔۔6، مارچ2014ء 

متحدہ قومی موومنٹ کے رکن قومی اسمبلی آصف حسنین نے کہا ہے کہ ملک بھر سے دہشت گردی اور انتہاء پسندی کاخاتمہ کئے بغیر امن ، استحکام اور ترقی و خوشحالی کی امید رکھنا بے کار ہے اور ان زمینی حقائق کو مد نظر رکھتے ہوئے ایم کیوایم 9مارچ اتوار کو لاہور کی وحدت کالونی میں واقع ڈونگی گراؤنڈ میں تاریخ ’’صوفیائے کرام ‘‘ کانفرنس کا انعقاد کررہی ہے اور اس کانفرنس کی کامیابی ملک کے استحکام کی ضمانت ہوگی ۔ ان خیالات کااظہار انہوں نے گزشتہ روز گجرانوالہ میں واقع چندہ قلعہ میں ’’صوفیائے کرام ‘‘ کانفرنس کے حوالے سے کارنر میٹنگ کے شرکاء سے خطاب اور چندہ قلعہ کی تاجر برادری سے ملاقاتوں کے دوران گفتگو کرتے کیا ۔ اس موقع پر ایم کیوایم صوبائی کمیٹی پنجا ب کے رکن شرافت زیدی ، سینٹر پنجاب کمیٹی کے نائب صدر رانا افتخار اور جوائنٹ سیکریٹری عبد الکریم ٹوکے بھی ان کے ہمراہ تھے ۔ آصف حسنین نے کہا کہ برصغیر پاک و ہند میں صوفیائے کرام اور اولیائے کرام نے اپنی تعلیمات کے ذریعے اسلام کی تبلیغ کی جس کے باعث برصغیر پاک و ہند میں لوگ اسلامی تعلیمات کی صحیح روح سے روشناس ہوئے ۔ انہوں نے کہاکہ آج افسوس کا مقام یہ ہے کہ ملک میں دہشت گردی اور انتہاء پسندی کے ذریعے صوفیائے کرام اور اولیائے کرام کی تعلیمات کو پسِ پشت ڈالا جارہا ہے اوردین اسلام کی شکل بگاڑی جارہی ہے جس کے باعث ملک بھر میں صوفیائے کرام کی تعلیمات اور پیغام کو دوبارہ سے اجاگر کرنے کی ضرورت ہے ۔ انہوں نے کہاکہ قائد تحریک جناب الطاف حسین موجودہ دور میں صوفیائے کرام کی تعلیمات کو اجاگر کرنے کی ضرورت کو نہ صرف محسوس کیا ہے بلکہ اس کیلئے عملی اقدام اٹھاتے ہوئے 9مارچ کو لاہور میں عظیم الشان صوفیائے کرام کانفرنس کا انعقا د کررہے ہیں جس میں اہل پنجاب زیادہ سے زیادہ تعداد میں شرکت کرکے اپنی قومی ذمہ داری کو پورا کریں اور صوفیائے کرام کی تعلیمات اور پیغام کے فروغ کیلئے اپنا حصہ ضرور ڈالیں ۔