حق پرست سینیٹرز کے وفد کی اسلام آباد میں فضاء ملک شہید کے والدین سے ملاقات

اسلام آباد۔۔۔6، مارچ2014ء

متحدہ قومی موومنٹ کے سینٹرز کے ایک وفد نے جمعرات کی شام اسلام آبادکچہری میں دہشت گردوں کی فائرنگ سے شہید ہونے والی جواں سال قانون داں فضاء ملک کی رہائش گاہ واقع بارہ کہوہ جاکرانکے والدین اور دیگر سوگواران سے ملاقات کی اور قائد تحریک جناب الطاف حسین کی جانب سے دلی تعزیت وہمدردی کااظہار کیا۔ وفد میں سینیٹ میں ایم کیوایم کے پارلیمانی لیڈر سینیٹربابرخان غوری، سینیٹر محترمہ نسرین جلیل، سینیٹر شرالہ ملک ،سینیٹر طاہر مشہدی اورسینیٹر حسیب خان شامل تھے ۔ وفد کے ارکان نے فضاء ملک کی شہادت پر سوگوارلواحقین کوقائد تحریک جناب الطاف حسین کی جانب سے دلی تعزیت کا پیغام پہنچایا۔ وفد کے ارکان نے سوگوارلواحقین سے دلی تعزیت کااظہارکرتے ہوئے کہاکہ جواں سال ہونہار صاحبزادی کی شہادت کا صدمہ یقیناًآپ کے لئے ناقابل فراموش ہے لیکن اللہ تعالیٰ کی مرضی کے آگے انسان بے بس ہے لہٰذا آپ صبرکریں ، انشاء اللہ سفاک قاتلوں پر اللہ کا عذاب نازل ہوگا۔ وفد کے ارکان نے فضاء ملک شہیدکے والدین کو یقین دلایا کہ دکھ کی اس گھڑی میں ایم کیوایم کے تمام کارکنان اور عوام آپ کے غم میں برابر کے شریک ہیں ۔ وفد کے ارکان کچھ دیر تک سوگوارلواحقین کے ساتھ رہے اور انہوں نے فضاء ملک شہید کے ایصال ثواب کیلئے فاتحہ خوانی بھی کی۔ فضاء ملک شہید کے والدین نے اظہار تعزیت پر جناب الطاف حسین اور حق پرست سینیٹرز کا شکریہ ادا کیا ۔