ایم کیوایم کی رابطہ کمیٹی کے ارکان احمد سلیم صدیقی اور سیف یار خان کی اہل سنت کے رہنما اور رویت ہلال کمیٹی پاکستان کے چیئرمین مفتی منیب الرحمن سے ملاقات

کراچی ۔۔۔2، مارچ2014ء 

متحدہ قومی موومنٹ کی رابطہ کمیٹی کے ارکان احمد سلیم صدیقی اور سیف یار خان نے گزشتہ روز اہل سنت کے رہنما اور رویت ہلال کمیٹی پاکستان کے چیئرمین مفتی منیب الرحمن سے ان کی رہائشگاہ پر ملاقات کی اور پنجاب کے شہر لاہور میں ایم کیوایم کے زیرا ہتمام 9مارچ کو ہونے والے ’’صوفیانہ کنونشن ‘‘ میں شرکت کی دعوت دی ۔اس موقع پر حق پرست رکن قومی اسمبلی ایس اے اقبال ، حق پرست رکن صوبائی اسمبلی انور رضا ، ایم کیوایم علماء کمیٹی کے انچارج جاوید احمد اور متحدہ بین المسلمین فورم کے جنرل سیکریٹری مفتی شمیم بھی ان کے ہمراہ تھے ۔ رابطہ کمیٹی کے ارکان نے مفتی منیب الرحمن کو قائد تحریک جناب الطاف حسین کا پیغام پہنچایا اور کہا کہ لاہور میں ہونے والا ’’صوفیانہ کنونشن ‘‘ انتہاء پسندی اور شدت پسندی کے خاتمے اور ملک میں امن و امان کے قیام کیلئے اہم سنگ میل ثابت ہوگا ۔ مفتی منیب الرحمن نے رابطہ کمیٹی کے ارکان سے گفتگو کرتے ہوئے ایم کیوایم کے زیراہتمام لاہور میں ہونے والے ’’صوفیانہ کنونشن ‘‘ کا خیرمقدم کیا اور اس میں شرکت کی یقین دہانی کرائی ۔ ملاقات میں ملک کی معاشی ، سیاسی اور امن و امان کی صورتحال کے علاوہ باہمی دلچسپی کے مختلف امور پر بھی تبادلہ خیال کیا گیا ۔