مسلح افواج سے اظہار یکجہتی کیلئے نکالی گئی ایم کیوایم کی فقید المثال ریلی نے ملک کے استحکام کی ضمانت دیدی ہے، احمد سلیم صدیقی

کراچی ۔۔۔یکم ،مارچ2014ء

متحدہ قومی موومنٹ کی رابطہ کمیٹی کے رکن احمد سلیم صدیقی نے کہا ہے کہ قائد تحریک جناب الطاف حسین نے طالبان دہشت گردوں کے خلاف فوج سے یکجہتی کے لئے عظیم الشان ریلی نکال کر پاکستانی قوم کی صحیح ترجمانی کی ہے اور ریلی میں لاکھوں کی تعداد میں عوام نے بھر پور طریقہ پر اپنے فوجی جوانوں کی قربانیوں پرانہیں زبردست خراج تحسین پیش کیا ہے۔ ان خیالات کا اظہار انہوں نے متحدہ قومی موومنٹ ایلڈرونگ کے زیر اہتمام نارتھ ناظم آباد بلاک جے میں منعقدہ کارنر میٹنگ سے خطاب کرتے ہوئے کیا۔ کارنر میٹنگ میں ایم کیوایم ایلڈرز ونگ کے ذمہ داران و کارکنان نے بڑی تعداد میں شرکت کی۔ احمد سلیم صدیقی نے کہا کہ ایم کیوایم کی جانب سے مسلح افواج سے اظہار یکجہتی کیلئے نکالی گئی فقید المثال ریلی نے ملک کے استحکام کی ضمانت دیدی ہے اور پوری دنیا کو بتادیا ہے کہ عوام اور فوج ملک کی حفاظت کے لئے متحد اور متفق ہیں۔ انہوں نے کہاکہ ملک میں جاری دہشت گردی کے عفریت کے خلاف قائد تحریک جناب الطاف حسین اور ایم کیوایم نے عملی کردار ادا کیا ہے اور اس کے مثبت نتائج مسلح افواج ، عوام اور ملک پر ضرور مرتب ہوں گے ۔احمد سلیم صدیقی نے کارنر میٹنگ کے شرکاء پر زور دیتے ہوئے کہاکہ ملک کی موجودہ نازک صورتحال میں بزرگ کارکنان پر بھاری ذمہ داری عائد ہوتی ہے اور تحریکی جدوجہد میں مشکل اور کٹھن حالات میں بزرگ کارکنان نے ہمیشہ ہمت اور جرات کے ساتھ حق پرستی کی جدوجہد کو جاری رکھا اور ملک میں جاری دہشت گردی کے خلاف جنگ میں ایم کیوایم کے بزرگ کارکنان کی ہمت ، حوصلہ اور جذبہ کسی سے کم نہیں ہے۔