نومارچ کو لاہور میں منعقد ہونے والی ’’صوفیاء کرامؒ کانفرنس‘‘ کے ا نتظامات کا جائزہ لینے کیلئے ایم کیو ایم رابطہ کمیٹی کا ڈونگی گراؤنڈکا دورہ

لاہور ۔۔۔۔۔28، فروری ، 2014 ء 

متحدہ قومی موومنٹ کی رابطہ کمیٹی کے اراکین عبدالحسیب ، اسلم شاہ آفریدی اور میاں عتیق نے 9مارچ کو لاہور میں منعقد ہونے والی ’’صوفیاء کرامؒ کانفرنس‘‘ کے ا نتظامات کا جائزہ لینے کیلئے ڈونگی گراؤنڈ بمقام ، وحدت کالونی ، نیو مسلم ٹاؤن ، لاہور کا دورہ کیا اور گراؤنڈ میں انتظامات کا جائزہ لیا ۔ اس موقع پر ، ایم کیوا یم صوبائی تنظیمی کمیٹی کے انچارج ارشاد ضفیر اوردیگر ذمہ داران و کارکنان بھی ان کے ہمراہ تھے ۔ رابطہ کمیٹی کے اراکین نے صوفیا کرام کانفرنس کی تیاریوں میں مصروف کارکنان سے گفتگو کرتے ہوئے کہا کہ 9مارچ کو ڈونگی گراؤنڈ لاہورمیں منعقد ہونے والی عظیم الشان صوفیاء کرامؒ کانفرنس ثابت کر دے گی کہ پنجاب کے عوام کسی ڈنڈہ بردار شریعت کو کبھی قبول نہیں کریں گے بلکہ صوفیاء کرام کی تعلیمات کے مطابق امن و آشتی اور محبت کے پیغام کو پنجاب کی گلی گلی و کوچے کوچے میں پھیلائیں گے ۔ انہوں نے کہا کہ پنجاب کے غیور عوام ’’ صوفیاء کرامؒ کانفرنس ‘‘ میں کثیر تعداد میں شرکت کر کہ اس بات کو عملی طور پر بھی ثابت کردیں گے کہ پنجاب کی دھرتی اولیاء و صوفیاء کرام کی دھرتی ہے ۔ انہوں نے پنجاب و پاکستان کے مخیر حضرات سے اپیل کی کہ وہ اس کانفرنس کو کامیاب بنانے کیلئے اپنا بھر پور کردار اد ا کریں ۔