ممتاز عالم دین اورمذہبی اسکالر علامہ تقی ہادی نقوی کے بہیمانہ قتل پر ایم کیوایم کے قائدالطاف حسین کااظہارمذمت

لندن ۔۔27فروری 2014ء

متحدہ قومی موومنٹ کے قائد جناب الطاف حسین نے مسلح دہشت گردوں کی فائرنگ سے ممتاز عالم دین اورمذہبی اسکالر علامہ تقی ہادی نقوی کے بہیمانہ قتل کی شدیدمذمت کی ہے۔ اپنے ایک بیان میں انہوں نے کہاکہ آج صبح ہی ابوالحسن اصفہانی روڈ کے علاقے میں فائرنگ کا ایک واقعہ ہواتھا جس میں ایک مدرسے کے مہتمم قاری علی حسن اورانکے صاحبزادے شہید ہوگئے تھے اوراب مسلح دہشت گردوں نے فائرنگ کرکے ایک ممتازعالم دین اورمذہبی اسکالر علامہ تقی ہادی نقوی کوشہیدکردیاہے جس کی جتنی بھی مذمت کی جائے کم ہے۔انہوں نے کہاکہ ان واقعات سے صاف ظاہر ہوتاہے کہ بعض قوتیں ایک منظم منصوبہ بندی کے تحت فرقہ وارانہ فسادات کی سازشیں کررہی ہیں اور دہشت گردی کے یہ واقعات اسی گھناؤنی سازش کاحصہ ہیں۔جناب الطاف حسین نے شیعہ سنی اورتمام مکاتب فکرسے تعلق رکھنے والے عوام سے اپیل کی کہ وہ صبروبرداشت سے کام لیں اورپرامن رہ کرفرقہ وارانہ فسادات کی سازشوں کوناکام بنادیں۔ جناب الطاف حسین نے علامہ تقی ہادی نقوی شہید اورقاری علی حسن شہیدکے لواحقین اوران کے تمام عقیدتمندوں اوراحباب سے دلی تعزیت اورہمدردی کااظہار کیااور دعاکی کہ اللہ تعالیٰ علامہ تقی ہادی نقوی،قاری علی حسن اورانکے صاحبزادے کو شہادت کا درجہ عطاکرے ، ان کے درجات بلندکرے،انہیں جنت الفردوس میں جگہ دے اورتمام سوگواروں کوصبرجمیل عطا کرے۔