بھتہ نہ دینے کی پاداش میں دہشت گردوں کی فائرنگ سے معروف مذہبی اسکالر جمیل راٹھور کے ماموں زاد بھائی ساجد کے بہیمانہ قتل پر ایم کیوایم رابطہ کمیٹی کااظہار مذمت
مقتول کی نماز جنازہ اور تدفین میں رابطہ کمیٹی رکن سیف یار خان، ایم کیوایم علماء کمیٹی ، متحدہ بین المسلمین فورم ، معروف و ممتاز علمائے کرام اور دیگر کی شرکت
کراچی ۔۔۔25، فروری 2014ء
متحدہ قومی موومنٹ کی رابطہ کمیٹی نے بھتہ نہ دینے کی پاداش میں حسن اسکوائر پر واقع میڈیکل اسٹور پر دہشت گردوں کی فائرنگ سے معروف مذہبی اسکالر جمیل راٹھور کے ماموں زادبھائی ساجد کے بہیمانہ قتل کی سخت ترین الفاظ میں مذمت کی ہے ۔ ایک بیان میں رابطہ کمیٹی نے کہاکہ جمیل راٹھور کے ماموں زاد بھائی کی بھتہ نہ دینے کی پاداش میں فائرنگ سے سفاکانہ قتل کی واردات سے ثابت ہوتا ہے کہ شہر میں جاری ٹارگٹڈ آپریشن کے باوجود جرائم پیشہ بھتہ خور دہشت گرد نہ صرف اپنی سماج دشمن کارروائیوں میں مصروف ہیں اور بے گناہ افرادکوقتل و غارتگری کا نشانہ بنا رہے ہیں جس کی جتنی بھی مذمت کی جائے کم ہے ۔ رابطہ کمیٹی نے مذہبی اسکالر جمیل راٹھور کے ماموں زاد بھائی ساجد کے بہیمانہ قتل پر تمام سوگوار لواحقین سے دلی تعزیت وہمدردی کااظہا رکرتے ہوئے انہیں صبر کی تلقین کی اور دعا کی کہ اللہ تعالیٰ مقتول کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے ۔ رابطہ کمیٹی نے وفاقی اور صوبائی حکومت سندھ سے مطالبہ کیا کہ بھتہ نہ دینے کی پاداش میں فائرنگ سے مذہبی اسکالر جمیل راٹھور کے سفاکانہ قتل میں ملوث جرائم پیشہ بھتہ خور دہشت گردوں کو فی الفور گرفتار کیاجائے اور شہریوں کی جان و مال کے تحفظ اور جرائم اور سماج دشمن سرگرمیوں میں ملوث عناصر کی بیخ کنی کیلئے ٹھوس اور مثبت اقدامات بروئے کار لائے جائیں ۔
دریں اثناء معروف مذہبی اسکالر جمیل راٹھور کے ماموں زاد بھائی ساجد کو مقامی قبرستان میں سپرد خاک کردیا گیا ۔ مقتول کی نما زجنازہ اور تدفین میں ایم کیوایم کی رابطہ کمیٹی کے رکن سیف یار خان ، ایم کیوایم علماء کمیٹی کے انچارج جاوید احمد ، متحدہ بین المسلمین فورم کے رکن اور معروف عالم دین علامہ علی کرار نقوی ، دیگر معروف و ممتاز علمائے کرام ،عمائدین شہر اور مقتول کے عزیز واقارب نے بڑی تعداد میں شرکت کی ۔