ایم کیوایم کے تمام تنظیمی شعبہ جات اتوار کو فوج، رینجرز، پولیس اور قانون نافذ کرنے والے اداروں سے اظہار یکجہتی کیلئے ہونے والی ریلی کو کامیاب بنانے کیلئے بھرپور طریقے سے فعال ہوجائیں۔ الطاف حسین

لندن۔۔۔21، فروری 2014ء

متحدہ قومی موومنٹ کے قائدجناب الطاف حسین نے ایم کیوایم کے تمام تنظیمی شعبہ جات سے کہاہے کہ وہ اتوارکوفوج ،رینجرزاورپولیس سے اظہار یکجہتی کے لئے ہونے والی ریلی کوکامیاب بنانے کیلئے بھرپور طریقے سے فعال ہوجائیں اوراپنی تمام ترتوانائیاں اس ریلی کو کامیاب اور تاریخ سازبنانے پرصرف کردیں۔ جناب الطاف حسین نے یہ جمعہ کی شب نائن زیروپر رابطہ کمیٹی اور ایم کیوایم کی مختلف تنظیمی کمیٹیوں اور شعبہ جات کے ارکان کے مشترکہ اجلاس سے فون پرخطاب کرتے ہوئے کہی۔ جناب الطاف حسین نے کہا کہ ایم کیوایم نے ماضی میں بھی انتہائی مختصر نوٹس پر عظیم الشان عوامی اجتماعات منعقد کئے ہیں اورمجھے یقین ہے کہ عوام اورکارکنان اس مرتبہ بھی اپنے الطاف بھائی کومایوس نہیں کریں گے اوربھاری تعدادمیں اتوار کومسلح افواج، رینجرز،پیراملٹری فورسز،پولیس اورقانون نافذ کرنے والے اداروں کے ساتھ یکجہتی کے لئے ہونے والی یکجہتی ریلی کوشاندارطریقے سے منعقد کرکے اوراس ریلی کوتاریخی بناکرثابت کردیں گے کہ وہ دہشت گردی کے خلاف جاری اس جنگ میں اپنی افواج، رینجرز،نیم فوجی اداروں ،پولیس اورسیکوریٹی فورسز کے شانہ بشانہ کھڑے ہیں۔انہوں نے عوام سے اپیل کی کہ وہ اپنے تمام ترلسانی، علاقائی، مذہبی،فروعی اورسیاسی اختلافات کوبالائے طاق رکھ کرمتحدہوجائیں اوراتوارکو شاہراہ قائدین پرہونے والی ایم کیوایم کی یکجہتی ریلی میں بھاری تعداد میں شریک ہوں۔