Altaf Hussain Expresses Condemnation Of The... by MQMOfficial
میڈیا کےدفاتراورصحافیوں پرحملہ آزادی صحافت پر حملہ ہے، الطاف حسین
میڈیاکے دفاتر اور صحافیوں کی جان ومال کے تحفظ کیلئے ٹھوس ، عملی اور مثبت اقدامات کیے جائیں
کراچی میں اے آروائی کے دفتر کو دہشت گردی کا نشانہ بنانے کی کوشش پر اظہار مذمت
لندن۔۔۔18، فروری2014ء
متحدہ قومی موومنٹ کے قائد جناب الطاف حسین نے کراچی میں اے آروائی کے دفتر کو دہشت گردی کا نشانہ بنانے کی کوشش کی سخت ترین الفاظ میں مذمت کرتے ہوئے کہاہے کہ میڈیا کے دفاتر اور صحافیوں پرحملے کو آزادی صحافت پر حملہ قراردیا ہے ۔ ایک بیان میں جناب الطاف حسین نے کہاکہ حق وسچ کا اظہار کرنے کی پاداش میں ایکسپریس ٹی وی، آج ٹی وی اور وقت ٹی وی کے دفاتر اور عملے کو دہشت گردی کا نشانہ بنایاجاچکا ہے لیکن حکومت وانتظامیہ کی جانب سے صحافیوں اورمیڈیا کے دفاتر کو تحفظ فراہم کرنے کیلئے کسی قسم کے اقدامات نہیں کیے گئے جس کے نتیجے میں آج اے آروائی کے دفتر کو دہشت گردی کا نشانہ بنانے کی کوشش کی گئی جس کی جتنی بھی مذمت کی جائے کم ہے ۔ انہوں نے کہاکہ دہشت گردی کے ذریعہ میڈیا کو سچائی کے اظہار سے روکنے اور صحافیوں کو ہراساں کرنے کی کوشش کی جارہی ہے لہٰذا اس دہشت گردی کے خلاف صحافیوں کو اتحاد ویکجہتی کامظاہرہ کرنا چاہئے۔
جناب الطاف حسین نے وزیراعظم میاں محمد نواز شریف، وفاقی وزیرداخلہ چوہدری نثارعلی خان ، گورنرسندھ ڈاکٹر عشرت العباد اور وزیراعلیٰ سندھ سید قائم علی شاہ سے مطالبہ کیا کہ میڈیا کے دفاتر کو دہشت گردی کا نشانہ بنانے کے واقعات کا سنجیدگی سے نوٹس لیاجائے ، اس کے ذمہ داروں کے خلاف سخت ترین کارروائی کی جائے اور میڈیاکے دفاتر اور صحافیوں کی جان ومال کے تحفظ کیلئے ٹھوس ، عملی اور مثبت اقدامات کیے جائیں ۔