نجی ٹی وی چینلز(آج ٹی وی اوروقت ٹی وی )کے دفاترپردستی بم سے حملوں کی پرزور مذمت کرتے ہیں۔انجینئر ناصر جمال ڈپٹی کنوینر ایم کیو ایم

کراچی:۔۔۔17؍فروری2014ء

متحدہ قومی موومنٹ کے ڈپٹی کنوینراور انچارج شعبہ اطلاعات انجینئر ناصر جمال نے نجی ٹی وی چینلز(آج ٹی وی اوروقت ٹی وی )کے دفاترپردستی بم حملوں کی سخت ترین الفاظ میں مذمت کی ہے اورصحافت پرحملہ اوربزدلانہ کارروائی قراردیاہے۔ایک بیان میں انجینئر ناصر جمال نے کہاکہ دہشت گردعناصراپنے مذموم مقاصدکی تکمیل کیلئے میڈیاکونشانہ بنارہے ہیں اورنجی ٹی وی چینلز(آج اوروقت ٹی وی) پردستی بموں سے حملہ اس سلسلے کی کڑی ہے جس کی جتنی بھی مذمت کی جائے کم ہے۔انہوں نے کہاکہ اس طرح بزدلانہ کارروائیاں کرکے دہشت گرداپنے مذموم مقاصدمیں کبھی کامیاب نہیں ہوسکتے۔چینلزدفاترپردستی بم حملوں سے چینلزسے وابستہ صحافیوں،رپورٹرز،کیمرہ مین اوردیگرعملے میں شدیدخوف وہراس پایاجارہاہے جنہیں جان ومال کاتحفظ دیناحکومت وانتظامیہ کی اولین ذمہ داری ہے۔انہوں نے چینلزکی انتظامیہ سے اظہارہمدردی کرتے ہوئے سندھ حکومت سے مطالبہ کیاکہ چینلزپردستی بم حملوں کاسختی سے نوٹس لیاجائے،تمام صحافتی اداروں،میڈیااوران سے وابستہ افرادکوتحفظ فراہم کیاجائے اوردستی بم حملوں میں ملوث دہشت گردوں کو گرفتارکرکے عبرتناک سزادی جائے۔