ایم کیوایم کے مرکز نائن زیرو اور اطراف کے علاقوں کی ٹیلیفون لائنوں کو سازشی منصوبے کے تحت خراب کردیا گیا

لندن ۔۔۔15 فروری 2014ء

متحدہ قومی موومنٹ کے قائدجناب الطاف حسین نے وزیراعظم نوازشریف ، وفاقی وزیرداخلہ چوہدری نثار، گورنرسندھ ڈاکٹرعشرت العباد اور وزیر اعلیٰ سندھ سیدقائم علی شاہ سے پرذوراحتجاج کرتے ہوئے مطالبہ کیاہے کہ وہ خفیہ اداروں یااداروں کے ان خفیہ ہاتھوں کوفی الفور تلاش کریں جنہوں نے ایم کیوایم کے مرکزنائن زیرواوراطراف میں موجود تمام ٹیلیفون لائنوں کوایک سازشی منصوبے کے تحت خراب کردیاہے جس کی وجہ سے نائن زیروپر فون ملانے میں سخت دشواری کا سامنا ہے اور بسا اوقات ایک منٹ کی بات کیلئے دودوگھنٹے لگ جاتے ہیں کیونکہ بیچ میں کبھی سننے والے کی اورکبھی سنانے والے کی آواز مکمل جملوں کے ساتھ نہیں پہنچتی اوربیچ میں خاموشی کاوقفہ آجا تا ہے۔ جناب الطاف حسین نے ملک کی ان بڑی بڑی شخصیات سے مطالبہ کیاکہ وہ معلوم کریں کہ پی ٹی سی ایل کے کون کونسے کارندے ایم کیوایم کے خلاف اس سازش میں مصروف ہیں کہ ایم کیوایم کے رابطے کوختم کردیاجائے۔انہوں نے کہاکہ حقیقت تویہ ہے کہ ٹیلیفون لائنوں میں خرابی کراچی آپریشن کرنے والے بڑے بڑے کرتادھرتاؤں کی سازش اورمشترکہ منصوبہ بندی کانتیجہ ہے کہ ایم کیوایم کوہرطرح سے اذیت اور مشکل میں ڈالاجائے۔جناب الطاف حسین نے ملک کی ممتازشخصیات سے دردمندانہ اپیل کی ہے کہ جس طرح 1992ء میں جنرل آصف نوازمرحو م کے دور میں آپریشن کا رخ ایم کیوایم کے خلاف موڑ دیاگیاتھااسی طرح آج بھی جرائم پیشہ عناصر کے خلاف شر وع کئے گئے موجودہ آپریشن کارخ ایم کیوایم کی طرف موڑ دیا گیا ہے اورتمام ترنشانہ ایم کیوایم اوراس کے سادہ لوح کارکنوں کوبنایاجارہاہے ۔ آخرمیں جناب الطا ف حسین نے یہ بھی مطالبہ کیا کہ پی ٹی سی ایل کے ذمہ داروں سے یہ بھی معلوم کیاجائے کہ نائن زیرو اوراس کے اطراف کے علاقوں کی لائنوں کوکس نے خراب کیاہے ۔