پولیس ٹرنینگ سینٹر کے قریب بم دھماکے پر جناب الطاف حسین کا اظہار مذمت

لندن:۔۔۔13؍فروری2014ء

متحدہ قومی موومنٹ کے قائد جناب الطاف حسین نے رزاق آباد میں پولیس ٹرنینگ کے قریب بم دھماکے کی سخت ترین الفاظ میں مذمت کی اور دھماکے میں متعدپولیس اہلکارں کی شہادت اور زخمی ہونے پر گہرے دکھ اورافسوس کااظہار کیا ہے ۔ ایک بیان میں جناب الطاف حسین نے کہا کہ دہشت گردی کے خلاف مسلح افواج ، سیکورٹی فورسز،قانون نفاذ کرنے والے ادارے اور عوام کی قربانیاں رائیگا ں نہیں جائیں گی اور دہشت گرد ملک و قوم کے کھلے دشمن ہیں۔ انہوں نے بم دھماکے میں شہید ہونے والے اہلکاروں کے سوگوار لواحقین سے دلی تعزیت وہمدردی کااظہار کرتے ہوئے دعا کی کہ اللہ تعالیٰ شہداء کو جنت الفردو س میں اعلیٰ مقام عطا فرمائے ، لواحقین کو صبرجمیل عطا کرے اور زخمیوں کو جلد ومکمل صحت یابی عطا فرمائے ۔ جناب الطاف حسین نے صدرممون حسین ، وزیراعظم میاں نواز شریف او روفاقی وزیر داخلہ چوہدری نثارعلی سے مطالبہ کیا کہ رزاق آباد میں بم دھماکے کا سختی سے نوٹس لیاجائے ،اس میں ملوث دہشت گردوں کے خلاف ٹھوس اور سخت نوعیت کے اقدامات عمل میں لائے جائیں ، عوام کی جان ومال کے تحفظ کو یقینی بنایاجائے اور بم دھماکوں کی مذموم کارورائیوں میں ملوث سفا ک دہشت گردوں اور ان کے سرپرستوں کو گرفتار کرکے قرار واقعی سزا دی جائے۔