صدرمملکت، وزیراعظم ، آرمی چیف ، ڈی جی آئی ایس آئی ،وفاقی وزیرداخلہ کراچی میں پولیس اور قانون نافذ کرنے والے اداروں کے مظالم بندکرائیں۔ایم کیوایم برطانیہ

لندن ۔۔۔ 12 فروری 2014ء

متحدہ قومی موومنٹ برطانیہ کے آرگنائزرڈاکٹرسلیم دانش اورآرگنائزنگ کمیٹی کے ارکان نے قانون نافذ کرنے والے اداروں کے اہلکاروں کے تشددکے نتیجے میں ایم کیوایم نارتھ کراچی سیکٹرکے کارکن محمدعادل کی شہادت کے واقعہ کی شدیدمذمت کی اوران کی شہادت پر دلی تعزیت اور افسوس کا اظہار کیا ہے۔ اپنے بیان میں انہوں نے کہاکہ کراچی میں ٹارگٹڈآپریشن کے نام پر ایم کیوایم کے کارکنوں اورہمدرد مہاجروں کو ریاستی ظلم وبربریت کانشانہ بنایاجارہا ہے۔ انہیں گرفتارکرکرکے سرکاری ٹارچرسیلوں میں وحشیانہ تشدد کا نشانہ بنایاجارہاہے، انہیں ماورائے عدالت قتل کیاجارہاہے ،گرفتارکرکے لاپتہ کیاجارہاہے۔ریاستی تشددکی حالیہ کارروائیوں کے نتیجے میں ایم کیوایم کے 11 کارکنان کو ماورائے عدالت قتل کیاجاچکاہے۔ڈاکٹرسلیم دانش اورآرگنائزنگ کمیٹی کے ارکان نے کہاکہ ایم کیو ایم نے تین روزقبل ہی اپنے کارکن سلمان کو سپردخاک کیاہے جنہیں سرکاری اہلکاروں نے ماورائے عدالت قتل کرکے ان کی لاش شاہ لطیف ٹاؤن کے علاقے میں پھینک دی تھی اوراب ایک اورکارکن محمد عادل کوحراست کے دوران سفاکانہ تشددکانشانہ بناکر شہیدکردیاگیاہے۔ انہوں نے کہاکہ کراچی میں ٹارگٹڈآپریشن کے نام پر انسانی حقوق کی سنگین خلاف ورزیاں کی جارہی ہیں اورایم کیوایم کے کارکنوں کوبالخصوص اورہمدردمہاجروں کوبالعموم ریاستی تشدد کانشانہ بنایاجارہاہے ۔ انہوں نے صدرمملکت ممنون حسین، وزیراعظم نواز شریف، چیف آف آرمی اسٹاف جنرل راحیل شریف ، ڈی جی آئی ایس آئی جنرل ظہیرالاسلام،فاقی وزیرداخلہ چوہدری نثار اوروفاقی وصوبائی حکومتوں سے مطالبہ کیاکہ ایم کیوایم کے کارکن محمد عادل شہیداوردیگرشہیدکارکنوں کے ماورائے عدالت قتل میں ملوث پولیس اورقانون نافذ کرنے والے اداروں کے اہلکاروں کو گرفتار کیا جائے اور کراچی میں پولیس اور قانون نافذ کرنے والے اداروں کے مظالم بندکرائے جائیں ۔ انہوں نے محمدعادل شہید کے لواحقین سے دلی تعزیت کااظہارکرتے ہوئے دعاکی ہے کہ اللہ تعالیٰ عادل شہید کی مغفرت فرمائے ، انہیں جنت الفردو س میں جگہ دے اورلواحقین کوصبرجمیل عطاکرے۔