حکومت کراچی، سندھ اور پاکستان کی ترقی کیلئے ایم کیوایم کو ساتھ لیکر چلنے کی خواہاں ہے۔ وزیر اعظم نواز شریف کی رابطہ کمیٹی کے رکن اور سینیٹ میں ایم کیوایم کے پارلیمانی لیڈر بابر خان غوری سے فون پر گفتگو

اسلام آباد۔۔۔11 فروری 2014ء

وزیراعظم میاں نوازشریف نے کہا ہے کہ کراچی پاکستان کی اقتصادی ترقی کی شہ رگ ہے اوران کی حکومت کراچی،سندھ اور پاکستان کی ترقی کیلئے ایم کیوایم کو ساتھ لیکر چلنے کی خواہاں ہے۔ وزیراعظم نے یہ بات ایم کیوایم کی رابطہ کمیٹی کے رکن اورسینیٹ میں ایم کیوایم کے پارلیمانی لیڈر بابر خان غوری سے منگل کی شب فون پر گفتگوکرتے ہوئے کہی۔ سینیٹر بابر غوری نے گفتگو میں میاں نوازشریف کوسندھ کے شہری علاقوں خصوصاً کراچی میں پولیس اورقانون نافذ کرنے والے دیگر اداروں کے اہلکاروں کی زیادتیوں، ایم کیوایم کے کارکنوں پر حراست میں کئے جانے والے وحشیانہ اورغیرانسانی تشدداورماورائے عدالت قتل کے واقعات کی تفصیلات سے آگاہ کیا ۔ انہوں نے وزیراعظم کوایم کیوایم کے  45کارکنوں کی گرفتاری کے بعد گمشدگی سے بھی آگاہ کیا اوران سے اپیل کی کہ وہ ان معاملات کافوری نوٹس لیں۔ وزیراعظم نوازشریف نے کہاکہ انہوں نے ایم کیوایم کی شکایات کانوٹس لے لیاہے اوروفاقی وزیرداخلہ چوہدری نثار علی خان کو فوری طورپر کراچی پہنچنے کی ہدایت کی ہے ۔ سینیٹربابرغوری کی جانب سے دورہ کراچی کی درخواست پر وزیراعظم نے بتایاکہ وہ ترکی کے دورے پرروانہ ہورہے ہیں تاہم معاملات کاجائزہ لینے کے لئے بھی خودبھی جلد ہی کراچی کادورہ کریں گے۔ وزیراعظم نے سینیٹربابرغوری کوبتایاکہ ان کی حکومت، ایم کیوایم کو ساتھ لے کرچلناچاہتی ہے اورخصوصاًکراچی میں وسیع پیمانے پر ترقیاتی کاموں کے لئے ایم کیوایم کے ساتھ کام کرنے کی خواہاں ہے جن میں ماس ٹرانزٹ سسٹم سمیت دیگربڑے ترقیاتی منصوبے شامل ہیں۔ وزیراعظم نوازشریف نے گفتگوکے دوران ایم کیوایم کے قائدالطا ف حسین کے لئے نیک خواہشات کا بھی اظہار کیا۔