ناظم آباد میں ا سنیپ چیکنگ کے دوران پولیس تشدد اوربدسلوکی سے ایم کیوایم کے ہمدرد بزرگ معراج الدین کے انتقال پر الطاف حسین کااظہار افسوس

لندن۔۔۔10، فروری 2014ء 

متحدہ قومی موومنٹ کے قائد جناب الطاف حسین نے ناظم آباد میں ا سنیپ چیکنگ کے دوران پولیس کی جانب سے تشدد اور بد سلوکی سے ایم کیوایم کے ہمدرد بزرگ معراج الدین کے انتقال پر گہرے دکھ اور افسوس کااظہار کیا ہے ۔ انہوں نے کہا کہ کراچی کو پولیس اسٹیٹ بنا دیا گیا ہے اور یہ واقعہ قانون نافذ کرنے والے اہلکاروں کے ظلم و بربریت کا ایک اور ثبوت ہے ۔ جناب الطاف حسین نے کہا کہ معراج الدین سے ا سنیپ چیکنگ کے دوران 10ہزار روپے طلب کئے گئے تھے لیکن معراج الدین کے پاس وقت دو ہزار روپے تھے جس پر پولیس مشتعل ہوگئی اور انہیں تھپڑ مارے اور دھکا دیا جس کی وجہ سے معراج الدین دل کا دورہ پڑنے سے موقع پر ہی جاں بحق ہوگئے ۔ انہوں نے کہاکہ درندگی، سفاکیت کے اس واقعہ کی جتنی بھی مذمت کی جائے کم ہے ، قانون نافذ کرنے والے اداروں کے اہلکاروں کو تحفظ کی علامت ہونا چاہئے لیکن وہ تو ظلم وبربریت کا نشان بن چکے ہیں ۔ جناب الطاف حسین نے حکومت سندھ سے سوال کیا کہ آخر وہ کیا کررہی ہے ۔ انہوں نے مطالبہ کیا کہ اس افسوس ناک واقعہ کا فوری نوٹس لیکر اس میں ملوث اہلکاروں کو گرفتار کیاجائے اور انہیں قرار واقعی سزا دی جائے ۔