حق پرست رکن سندھ اسمبلی محمد کامران پر دہشت گردوں کے قاتلانہ حملے پر ایم کیوایم رابطہ کمیٹی کااظہار مذمت
دہشت گرد شہر اور ملک کو عدم استحکام سے دو چار کرنا چاہتے ہیں ، رابطہ کمیٹی ایم کیوایم
شہر میں قیام امن اور جرائم کی وارداتوں پر قابو پانے کیلئے عوامی توقعات اور امیدوں پر پورا اترنے والے اقدامات فی الفور بروئے کار لائے جائیں ، ایم کیوایم رابطہ کمیٹی کا وفاقی و صوبائی حکومت مطالبہ
کراچی ۔۔۔25، جنوری 2014ء
متحدہ قومی موومنٹ کی رابطہ کمیٹی نے نارتھ کراچی میں متحدہ قومی موومنٹ کے رکن سندھ اسمبلی محمد کامران کی گاڑی پر دہشت گردوں کی فائرنگ کی سخت ترین الفاظ میں مذمت کی ہے اور قاتلانہ حملے کو بزدلانہ کارروائی قرار دیاہے ۔ ایک بیان میں رابطہ کمیٹی نے کہاکہ شہر میں دہشت گردی ، فائرنگ اور دستی بموں سے حملے کی کاررائیوں کا تسلسل کے ساتھ جاری رہنا محب وطن عوام کیلئے باعث تشویش تو بنا ہوا ہی تھا لیکن اب دہشت گردوں نے عوام کے منتخب نمائندوں پر قاتلانہ حملہ کرکے ثابت کردیا ہے کہ وہ شہر اور ملک کو عدم استحکام سے دوچار کرنا چاہتے ہیں ۔ رابطہ کمیٹی نے محمد کامران کی گاڑی پر فائرنگ کے نتیجے میں زخمی ہونے والے محافظ سے دلی ہمدردی کااظہار کرتے ہوئے ان کی جلد ومکمل صحت یابی کیلئے دعا بھی کی ۔ رابطہ کمیٹی نے وفاقی اور صوبائی حکومت سندھ سے مطالبہ کیا کہ حق پرست رکن سندھ اسمبلی محمدکامران پر قاتلانہ حملے میں ملوث درندہ صفت دہشت گردوں کو فی الفور گرفتار کیاجائے اور شہر میں قیام امن ، قتل و غارتگری ، دستی بموں سے حملوں اور دیگر جرائم کی وارداتوں پر قابو پانے کیلئے عوامی توقعات اور امیدوں پر پورا اترنے والے اقدامات فی الفور بروئے کار لائے جائیں ۔