سکھر میں طلبہ و طالبات کی ڈگریاں تسلیم نہ کئے جانے پر حق پرست ارکان صوبائی اسمبلی کااظہار تشویش

 

کراچی ۔۔۔25، جنوری 2014ء 

متحدہ قومی موومنٹ کے حق پرست ارکان صوبائی اسمبلی نے سکھر میں غلام محمد میڈیکل کالج اور پاکستان میڈکل اینڈ ڈینٹل کالج کے درمیان الحاق نہ ہونے کے باعث سینکڑوں طلبہ و طالبات کی ڈگریاں تسلیم نہ کئے جانے پر گہری تشویش کااظہار کیا ہے اور طلبہ و طالبات کے ساتھ ہونے والے اس ظلم کو صوبائی حکومت کی نااہلی قرار دیا ہے ۔ اپنے مشترکہ بیان میں انہوں نے کہاکہ صوبائی حکومت کا یہ فرض بنتا تھا کہ جب داخلے شروع ہوئے تھے تو غلام محمد میڈیکل کالج کاپاکستان میڈیکل اینڈ ڈینٹل کالج کے ساتھ الحاق کرانے پر توجہ دیتی ۔ انہوں نے کہا کہ حکومت کی مجرمانہ غفلت کے باعث سینکڑوں طلبہ و طالبات کا مستقبل داؤ پر لگ گیا ہے جس کے باعث طلبہ و طالبات اور ان کے والدین میں غم و غصہ اور اشتعال کا پایا جانا فطری عمل ہے ۔ ارکان صوبائی اسمبلی نے حکومت سندھ سے مطالبہ کیا کہ سکھر میں غلام محمد میڈیکل کالج اور پاکستان میڈیکل اینڈ ڈینٹل کالج کے درمیان الحاق پر فی الفور توجہ دیکر معاملہ حل نکالے اور طلبہ وطالبات کی ڈگریوں کو تسلیم کرکے ان میں پائی جانے والی تشویش اور بے چینی کا خاتمہ کیاجائے ۔