گوجرانوالہ میں حکمراں جماعت کےکارکنوں کی جانب سےشدید ہوائی فائرنگ قابل مذمت ہے ،ایم کیوایم
مختلف سیاسی ومذہبی جماعتوں کی جانب سےکراچی میں اسلحہ کی بازیابی کیلئےگھرگھرآپریشن کامطالبہ کیاجاتا ہے
لیکن ملک کےدیگرشہروں میں جرائم کی وارداتوں اوراسلحہ کےآزادانہ استعمال کےواقعات پرمجرمانہ خاموشی اختیارکرلی جاتی ہے
جب حکمراں جماعت کھلے عام قانون شکنی کرے تو آئین کی بالادستی اور قانون کی حکمرانی کیسے قائم کی جاسکتی ہے ؟
مسلم لیگی رہنماء خرم دستگیرکے وفاقی وزیربننے پرمسلم لیگی کارکنوں کی ہوائی فائرنگ پرحق پرست ارکان قومی اسمبلی کا اظہارمذمت
کراچی ۔۔۔24، جنوری2014ء
متحدہ قومی موومنٹ کے حق پرست ارکان قومی اسمبلی نے مسلم لیگی رہنماء خرم دستگیرکے وفاقی وزیربننے پر گوجرانوالہ میں حکمراں جماعت کے کارکنوں کی جانب سے شدید ہوائی فائرنگ کی سخت الفاظ میں مذمت کی ہے ۔ اپنے مشترکہ بیان میں انہوں نے کہاکہ مختلف سیاسی ومذہبی جماعتوں کی جانب سے کراچی میں اسلحہ کی بازیابی کیلئے گھرگھرآپریشن کے مطالبہ کیا جاتا ہے لیکن صوبہ پنجاب کے مختلف شہروں سمیت ملک کے حصوں میں قتل وغارتگری ، اغواء برائے تاوان ، مسلح دہشت گردی ،ڈکیتی ، لوٹ ماراوراسلحہ کے آزادانہ استعمال کے روزمرہ واقعات پران کی جانب سے مجرمانہ خاموشی اختیارکرلی جاتی ہے ۔ انہوں نے کہاکہ گزشتہ دنوں پی ٹی آئی کے کارکنوں کی جانب سے اسلحہ کی آزادانہ نمائش واستعمال کی گئی جبکہ آج گوجرانوالہ میں مسلم لیگی رہنماء خرم دستگیرکے وفاقی وزیربننے پر مسلم لیگی کارکنوں کی جانب سے جدیدترین اسلحہ کی آزادانہ نمائش کی گئی اور شدید ہوائی فائرنگ کی گئی جس کی جتنی بھی مذمت کی جائے کم ہے۔ حق پرست ارکان قومی اسمبلی نے کہاکہ جب حکمراں جماعت، اس کے کارکنوں اور وفاقی وزراء کی جانب سے کھلے عام قانون شکنی کی جائے گی اور جدید ترین اسلحہ کی آزادانہ نمائش اور استعمال کیا جائے گا تو آئین کی بالادستی اور قانون کی حکمرانی کیسے قائم کی جاسکتی ہے ؟