ہزارہ برادری اور حکومت کے درمیان کامیاب مذاکرات خوش آئند ہیں، رابطہ کمیٹی
امید ہے کہ مستونگ کے واقعہ کی تحقیقات اور اس میں ملوث سفاک دہشت گردوں کو قانون کے کٹہرے میں لایا جائے گا، رابطہ کمیٹی
پرامن احتجاجی مظاہرے میں ہزارہ برادری کے افراد نے جس تحمل کا مظاہرہ کیا وہ قابل ستائش ہے
کراچی:۔۔23؍ جنوری 2014ء
متحدہ قومی موومنٹ کی رابطہ کمیٹی نے حکومتی ارکان وفاقی وزیر داخلہ چوہدری نثار علی خان اور وفاقی وزیر اطلاعات و نشریات پرویز رشید اور ہزارہ برادری کے درمیان کامیاب مذاکرات کو خوش آئندہ قرار دیا ہے ۔ ایک بیان میں رابطہ کمیٹی نے امید ظاہر کی کہ حکومت مستونگ کے واقعہ کی تحقیقات اور اس میں ملوث سفاک دہشت گردوں کو قانون کے کٹہرے میں لانے اور ہزارہ برادری کو انصاف دلانے کے حوالے سے یقین دہانی پر پورا اترے گی اور ہزارہ برادری کو مایوس نہیں کرے گی۔ رابطہ کمیٹی نے ہزارہ برادری کو اپنے جائز مطالبات منوانے کیلئے پرامن دھرنے دینے پر زبردست انداز میں سراہتے ہوئے کہا کہ ہزارہ برادری نے اس قومی سانحہ اور غم زدہ ہونے کے باوجود جس تحمل مزاجی کا مظاہرہ کیا وہ قابل ستائش ہے ۔رابطہ کمیٹی کے ارکان نے ہزارہ برادری کی امن پسندی اور کامیاب احتجاجی دھرنے کو بھی سراہا ہے ۔