نجی ٹی وی چینل (سماء) کے کیمرہ مین پر سرکاری اہلکاروں کے تشدد کے واقعہ پر رابطہ کمیٹی کا اظہار مذمت
نجی ٹی وی کے کیمرہ مین پر بہیمانہ تشدد اور کیمرہ توڑنے کا واقعہ آزادی صحافت کی خلاف ورزی ہے فی الفور نوٹس لیا جائے، رابطہ کمیٹی
عوام کو اصل حقائق سے آگاہ کرنے کیلئے میڈیا کو اظہارِ رائے کی آزادی ہونا چاہئے قانون نافذ کرنیوالے ادارے کے اہلکاروں کی جانب سے میڈیا کے نمائندوں پر تشدد لمحہ فکریہ ہے
کراچی:۔۔۔23؍جنوری2014ء
متحدہ قومی موومنٹ کی رابطہ کمیٹی نے سرکاری اہلکاروں کی جانب سے نجی ٹی چینل (سماء) کے کیمرہ مین کو کوریج سے روکنے کیلئے بہیمانہ تشدد کا نشانہ بنانے اورکیمرہ توڑنے کی شدیدالفاظ میں مذمت کا اظہار کیا ہے اور اس عمل کو آزادی صحافت کی کھلم کھلا خلاف ورزی قرار دیا ہے۔ ایک بیان میں رابطہ کمیٹی نے کہاکہ میڈیا کو اظہارِ رائے کی آزادی ہونا چاہئے تاکہ وہ عوام کواصل حقائق سے آگاہ کرکے اپنی بنیادی ذمہ داری پوری کرسکیں تاہم سرکاری اہلکاروں کی جانب سے میڈیا کے نمائندوں پربہیمانہ تشددکے واقعات لمحہ فکریہ ہیں۔ رابطہ کمیٹی نے تشدد کا نشانہ بننے والے کیمرہ مین سے اظہار ہمدردی کرتے ہوئے حکومت سندھ سے مطالبہ کیا کہ نجی ٹی وی چینل(سماء)کے کیمرہ مین پر سرکاری اہلکاروں کی جانب سے بہیمانہ تشدد کا نوٹس لیاجائے اورذمہ دار اہلکاروں کے خلاف قانون کے مطابق کارروائی کی جائے۔