سیاسی جماعتیں عوامی خدمت کے نام پر سیاست کرتی ہیں جبکہ جناب الطاف حسین نے اس تحریک کے آغازسے سیاست میں خدمت کو متعارف کرایا ،ڈاکٹر خالد مقبول صدیقی

کراچی۔۔۔21جنوری2014

متحدہ قومی موومنٹ کی رابطہ کمیٹی کے ڈپٹی کنوینر ڈاکٹر خالد مقبو ل صدیقی نے اراکین رابطہ کمیٹی کے ہمراہ لال قلعہ گراؤنڈ عزیز آباد میں ایم کیو ایم میڈیکل ایڈ کمیٹی کے زیر اہتمام سالِ نو کے موقع پر کیلنڈر برائے 2014ء کا اجراء کردیاگیا۔ اس موقع پر ایم کیو ایم رابطہ کمیٹی کے اراکین واسع جلیل ،کیف الوریٰ احمد سلیم صدیقی ،خالد سلطان ،ایم کیو ایم میڈیکل ایڈ کمیٹی کے انچارج فاروق جمیل و اراکین سمیت مختلف اسپتالوں ،ڈسپینسریوں سے تعلق رکھنے والے ذمہ داران و کارکنان کی بڑی تعداد موجود تھی۔تقریب کے شرکاء سے خطاب کرتے ہوئے ڈپٹی کنوینر ڈاکٹر خالد مقبول صدیقی نے کہا کہ پاکستان کی سیاسی جماعتیں عوامی خدمت کے نام پر سیاست کرتی ہیں لیکن جناب الطاف حسین نے اس تحریک کے آغاز سے سیاست میں خدمت کو متعارف کرایا یہی وجہ ہے کہ عوام سے ایم کیو ایم کا رشتہ درد کا ہے لیکن ہمارے مخالفین اسے ڈر کا رشتہ کہتے ہیں۔انہوں نے کہا کہ آج پاکستان کو مذہب کے نام پر دہشتگردو ں نے جس طرح یرغمال بنایا ہوا ہے وہ جہالت اور بربریت ہے،کیونکہ ہم یہ سمجھتے ہیں کہ پاکستان کو کسی غیر ملکی جارحیت سے خطرہ نہیں بلکہ ہمارے ملک میں موجود انتہا پسند اور دہشت گرد گروپوں سے ہے۔انہوں نے کہا کہ آج قیوم آباد میں پولیو ورکرز کو جس درندگی اور جہالت کے ساتھ دہشت گردی کا نشانہ بنایا گیا ایم کیو ایم اس واقعے کی شدید مذمت کرتی ہے،اور سمجھتی ہے دہشت گرد عناصر ہمارے معاشرے کو فالج زدہ اور پولیو زدہ بنانا چاہتے ہیں۔انہوں نے کہا کہ تمام ممالک سے پولیو کا خاتمہ ہورہا ہے لیکن اگر دنیا میں کوئی پولیو کا کیپٹل ہے تو وہ پشاور ہے جہاں عمران خان کی حکومت ہے۔انہوں نے کہا کہ جناب الطاف حسین وہ واحد لیڈر ہیں جو طالبان دہشتگردوں کے خلاف بھر پور آواز اٹھاتے ہیں جبکہ ملک میں کوئی ایسا لیڈر یا سیاستدان موجود نہیں ہے جو دہشت گرد کو دہشت گرد کہنے کی جرات و ہمت کرے۔انہوں نے کہا کہ قائد تحریک مسلسل اپنے بیانات میں یہ کہہ رہے ہیں کہ طالبان سے مذاکرات کے حوالے سے جو بھی فیصلہ کرنا ہے وہ کرلیں ایسا نہ ہوکہ کہ کہیں دیر ہوجائے۔کیلنڈر کے اجراء کی تقریب سے خطاب کرتے ہوئے انچارج میڈیکل ایڈ کمیٹی فاروق جمیل نے کہا کہ میڈیکل ایڈ کمیٹی ملک میں آنے والی قدرتی آفات اور سانحات کے موقع پر قائد تحریک کے ہر اول دستے کی صورت میں متاثرہ بھائیوں کی بھر پو ر خدمت کرتی ہے یہی جناب الطاف حسین کا ویژن و مقصد ہے۔دریں اثناء خالد مقبول صدیقی اور اراکین رابطہ کمیٹی نے کیلنڈر برائے 2014ء کا اجراء کیا گیا تو فضاؤں میں پرندے چھوڑے گئے اور پنڈال میں موجود کارکنان پر پھولوں کی پتیاں نچھاور کی گئیں۔