ایم کیوایم نے سانحہ مستونگ کے خلاف شیعہ علماء کونسل کے تین روزہ سوگ کی حمایت کا اعلان کردیا
عوام دہشت گردی کا شکار شہریوں کے سوگوار لواحقین سے اظہار یکجہتی کیلئے تین روزہ سوگ میں شرکت کریں
کراچی ۔۔۔21، جنوری 2014ء
متحدہ قومی موومنٹ کی رابطہ کمیٹی نے صوبہ بلوچستان کے شہر مستونگ میں زائرین کی بس پر بم دھماکہ کے خلاف شیعہ علماء کونسل کی جانب سے تین روزسوگ کی بھرپورحمایت کا اعلان کردیاہے۔ ایک بیان میں رابطہ کمیٹی نے زائرین کی بس پربم دھماکہ کی شدید الفاظ میں مذمت کی ہے اور بم دھماکے میں درجنوں زائرین کے شہید وزخمی ہونے پر گہرے دکھ اور افسوس کا اظہار کیا ہے۔ رابطہ کمیٹی نے مستونگ میں زائرین کی بس پر دھماکہ المناک واقعہ کے خلاف شیعہ علماء کونسل کی جانب سے تین روزہ سوگ کا اعلان کی بھرپورحمایت کا اعلان کرتے ہوئے حق پرست عوام سے اپیل کی کہ وہ دہشت گردی کا شکار بے گناہ شہریوں کے سوگوار لواحقین سے اظہاریکجہتی کیلئے تین روزہ سوگ میں شرکت کریں اور شہداء کے ایصال ثواب کیلئے فاتحہ خوانی کریں۔