طالبان اور دیگر کالعدم تنظیموں کے دہشت گردوں کے مسلسل حملوں کے باوجود حکومت سندھ کی جانب سے پولیو ورکرز کو تحفظ فراہم نہ کرنا قابل مذمت ہے۔ ارکان سندھ اسمبلی ایم کیوایم

کراچی ۔۔۔۔21 جنوری 2014ء

متحدہ قومی موومنٹ کے ارکان سندھ اسمبلی نے کراچی میں پولیوورکرزپر طالبان اوردیگرکالعدم تنظیموں کے دہشت گردوں کے مسلسل حملوں کے باوجود حکومت سندھ کی جانب سے پولیوورکرزکوتحفظ فراہم نہ کرنے کی شدید مذمت کی ہے ۔ اپنے ایک بیان میں ارکان سندھ اسمبلی نے کہاکہ کراچی میں اس سے قبل بھی سہراب گوٹھ اوردیگرعلاقوں میں کالعدم تنظیموں کے دہشت گردوں کی جانب سے پولیوورکرزپر حملے ہوچکے ہیں اورکئی پولیوورکزاس دہشتگردی کانشانہ بن چکے ہیں لیکن تمام تراعلانات کے باوجود حکومت سندھ کی جانب سے پولیوورکرزکوکسی قسم کاتحفظ فراہم نہیں کیاگیا۔آج بھی کراچی کے علاقے قیوم آباد میں انسانیت دشمن مسلح دہشت گردوں نے وحشیانہ فائرنگ کرکے تین پولیوورکزکوشہیدکردیاجن میں دوخواتین بھی شامل ہیں اسکے علاوہ دیگرورکززخمی ہوئے ۔ ارکان سندھ اسمبلی نے کہا کہ حکومت سندھ نے پولیو ورکز کی درخواست کے باوجود انہیں کوئی تحفظ فراہم نہیں کیا اور ان پر دہشت گردی کے اس حملے پر شرمندگی اور ذمہ داری قبول کرنے کے بجائے الٹا پولیو ورکرز ہی کو اس کا ذمہ دار ٹھہرایا جارہا ہے جو انتہائی قابل مذمت ہے۔ اسی صورتحال کے باعث مجبور ہوکر پولیوورکرزنے انسداد پولیو مہم بند کرنے کااعلان کردیاہے۔ ارکان سندھ اسمبلی نے کہاکہ حکومت سندھ کی اس سے زیادہ بے حسی کیاہوگی کہ اتنے بڑے واقعہ کے باوجود اب تک پولیوورکرز کو شہید کرنے والے دہشت گردوں کے خلاف کسی بھی قسم کی کوئی کارروائی نہیں کی گئی ہے۔ ارکان سندھ اسمبلی نے کہاکہ اگرحکومت سندھ پولیو ورکرز کو تحفظ فراہم نہیں کرسکتی توانہیں دہشت گردوں کے رحم وکرم پر چھوڑکران کی زندگیوں سے کیوں کھیل رہی ہے؟ارکان سندھ اسمبلی نے دہشت گردوں کی فائرنگ سے شہید ہونے والے پولیوورکرزکے لواحقین سے دلی تعزیت کا اظہار کیا اور زخمیوں کی جلد صحتیابی کی دعاکی اور ایم کیوایم کی جانب سے تمام پولیو ورکرز سے مکمل ہمدردی اور یکجہتی کا اظہار کیا۔