کراچی کے علاقے قیوم آباد میں پولیو کے قطرے پلانے والی رضاکاروں کی ٹیم پر فائرنگ کے سفاکانہ واقعہ پر الطاف حسین کا اظہار مذمت

لندن۔۔۔21، جنوری 2013ء 

متحدہ قومی موومنٹ کے قائد جناب الطاف حسین نے کراچی کے علاقے قیوم آباد میں پولیو کے قطرے پلانے والی رضاکاروں کی ٹیم پر فائرنگ کی شدید مذمت کی ہے اور فائرنگ کے نتیجے میں دو خواتین سمیت تین افراد کی ہلاکت پر گہرے دکھ اور افسوس کا اظہار کیا ہے اور پولیو ٹیم کے رضاکاروں پر فائرنگ کے واقعہ کو انتہائی وحشیانہ عمل قرار دیا ہے۔ ایک بیان میں انہوں نے کہا کہ پولیو ٹیم کے ورکرز انسانیت کی خدمت کا انتہائی نیک کام کررہے ہیں انہیں مکمل تحفظ فراہم کیاجائے۔ انہوں نے فائرنگ کے نتیجے میں ہلاک ہونے والی خواتین و مرد پولیو رضاکاروں کے تمام سوگوار لواحقین سے دلی تعزیت و ہمدردی کرتے ہوئے ان کی مغفرت، لواحقین کیلئے صبر جمیل اور زخمیوں کی جلد صحت یابی کیلئے دعا بھی کی ۔ جناب الطاف حسین نے حکومت سندھ سے مطالبہ کیا کہ قیوم آباد کے جس علاقے میں پولیو رضاکاروں کی ٹیم پر فائرنگ کا سفاکانہ واقعہ ہوا ہے اس علاقے کا محاصرہ کرکے قاتلوں کو فی الفور گرفتار کیا جائے۔