ملک سے دہشت گردی کے خاتمے کیلئے بلا تاخیر ٹھوس لائحہ عمل تشکیل دیا جائے، سینیٹر بابر غوری

کراچی ۔۔۔19، جنوری 2014ء

سینیٹ میں ایم کیوایم کے پارلیمانی لیڈر سینیٹر بابر خان غوری نے کہاہے کہ ملک سے دہشت گردی کے خاتمے کیلئے بلاتاخیر ٹھوس لائحہ عمل تشکیل دیا جائے ۔ ایک بیان میں انہوں نے صوبہ خیبرپختونخواکے شہر بنوں میں واقع فوجی چھاؤنی میں سیکوریٹی فورسز کے قافلے پر ہولناک بارودی دھماکے کی سخت ترین الفاظ میں مذمت کرتے ہوئے کہا کہ حکومت اور قومی سلامتی کے اداروں کی جانب سے طالبان سے مذاکرات کرنے یا نہ کرنے کے اہم ترین معاملہ پر مسلسل تاخیر کی جارہی ہے جس کا خمیازہ مسلح افواج ، رینجرز وپولیس کے اہلکاروں اور معصوم عوام کو بھگتنا پڑرہا ہے ۔ اگر مسلح افواج ، رینجرز اورپولیس کے افسران واہلکار مسلسل دہشت گردوں کا نشانہ بنتے رہیں گے تو مسلح افواج اور قانون نافذ کرنے والے اداروں کے اہلکاروں کی مایوسی میں اضافہ ہوسکتا ہے ۔ بابرغوری نے وزیراعظم نواز شریف ، وفاقی وزیرداخلہ چوہدری نثار علی خان اور مسلح افواج کے سربراہان سے کہاکہ ملک سے دہشت گردی کے خاتمے کیلئے بلاتاخیر ٹھوس لائحہ عمل تشکیل دیا جائے اور شہریوں کی جان ومال کے تحفظ کیلئے ہرممکن اقدامات بروئے کار لائے جائیں۔