وفاقی حکومت اور مسلح افواج کو اب یا کبھی نہیں کی بنیاد پر فیصلہ کرنا ہے، ڈاکٹر فاروق ستار

کراچی ۔۔۔19، جنوری 2014ء

قومی اسمبلی میں ایم کیوایم کے پارلیمانی لیڈر ڈاکٹر فاروق ستار نے بنوں میں فوجی چھاؤنی پر دہشت گردی کی شدید مذمت کی ہے اور بم دھماکے کے نتیجے میں درجنوں فوجی اہلکاروں کے شہید وزخمی ہونے پرگہرے دکھ اور افسوس کا اظہار کیا ہے۔ ایک بیان میں ڈاکٹر فاروق ستار نے کہا کہ طالبان دہشت گردوں کی جانب سے مسلح افواج اور عام شہریوں کو مسلسل نشانہ بنایاجارہا ہے لیکن حکومت اور قومی سلامتی کے اداروں کی جانب سے اب تک یہ فیصلہ نہیں کیا گیا ہے کہ وہ طالبان سے مذاکرات کرنا چاہتے ہیں یا نہیں۔ انہوں نے کہا کہ قائد تحریک جناب الطاف حسین مسلسل مطالبہ کررہے ہیں کہ حکومت اور قومی سلامتی کے ادارے طالبان سے مذاکرات کرنے یا نہ کرنے میں تاخیر نہ کریں ، حکومت اور مسلح افواج کے سربراہان سرجوڑ کربیٹھیں اور ملک وقوم کو دہشت گردی سے نجات دلانے کیلئے ٹھوس لائحہ عمل بنائیں لیکن افسوس کہ جناب الطاف حسین کے مطالبات پر کوئی توجہ نہیں دی جارہی ہے ۔ ڈاکٹر فاروق ستارنے کہا کہ اب وفاقی حکومت اور مسلح افواج کواب یا کبھی نہیں کی بنیاد پر طے کرنا ہوگا کہ انہیں طالبان سے مذاکرات کرنے ہیں یا کوئی اور فیصلہ کرنا ہے۔