جمعیت علمائے اسلام (س) کے رہنما مفتی عثمان یار خان اور ان کے دو ساتھیوں کا بہیمانہ قتل قابل مذمت ہے۔ الطاف حسین

لندن۔۔۔17 جنوری 2014ء

متحدہ قومی موومنٹ کے قائدجناب الطاف حسین نے کراچی میں مسلح دہشت گردوں کی فائرنگ سے جمعیت علمائے اسلام( سمیع الحق گروپ )کے رہنمامفتی عثمان یارخان اوران کے دوساتھیوں کے بہیمانہ قتل کی شدیدمذمت کی ہے۔ اپنے بیان میں جناب الطاف حسین نے کہاکہ حکومت سندھ کی جانب سے کراچی میں قیام امن کیلئے ٹارگٹڈ آپریشن کے دعوے کئے جارہے ہیں لیکن حکومت کے تمام تردعووں کے باوجود شہرمیں روزانہ قتل اوردہشت گردی کے واقعات ہورہے ہیں۔ سیاسی کارکنوں ، تاجروں، دکانداروں اورعام شہریوں کو دن دہاڑے قتل کیا جارہاہے ۔حتیٰ کہ پولیس اہلکاروں پربھی دہشت گردوں کی جانب سے حملے کئے جارہے ہیں اورگزشتہ دو روز کے دوران پولیس چوکیوں اورموبائلوں پرکئی حملے ہوچکے ہیں جن میں کئی پولیس اہلکاربھی شہید ہوچکے ہیں لیکن یہ امر انتہائی افسوسناک ہے کہ ان واقعات پر حکومت کی جانب سے کوئی سنجیدہ ایکشن نہیں کیاجارہاہے ۔ جناب الطاف حسین نے حکومت سے مطالبہ کیاکہ مفتی عثمان یارخان اورانکے ساتھیوں کے بہیمانہ قتل کے واقعہ کی تحقیقات کرائی جائے اور قاتلوں کوفی الفورگرفتارکیا جائے۔ انہوں نے مفتی عثمان یارخان شہید اور واقعہ میں جاں بحق ہونے والے ان کے ساتھیوں کے لواحقین اورجے یوآئی(س) کے تمام رہنماؤں اورکارکنوں سے دلی تعزیت کااظہارکیااوردعاکی کہ اللہ تعالیٰ مقتولین کی مغفرت فرمائے اورتمام سوگواروں کوصبرجمیل عطاکرے۔