نواب شاہ میں ٹریفک حادثے میں جاں بحق ہونے والوں کے لواحقین کو 50 لاکھ روپے فی کس معاوضہ دیا جائے، ایم کیوایم

کراچی ۔۔۔17، جنوری2014ء

ایوان بالا سینیٹ میں ایم کیوایم کے پارلیمانی لیڈر سینیٹر بابر خان غوری ، قومی اسمبلی میں پارلیمانی لیڈر ڈاکٹر فاروق ستار اور سندھ اسمبلی میں پارلیمانی لیڈر سید سردار احمد نے حکومت سندھ سے مطالبہ کیا ہے کہ نواب شاہ میں جاں بحق ہونے والے اسکول کے طلباء اور اساتذہ کے لواحقین کو 50 لاکھ روپے فی کس معاوضہ دیا جائے۔ اپنے مشترکہ بیان میں انہوں نے کہا کہ انسانی جان کا کوئی نعم البدل نہیں ہوتا تاہم اس مہنگائی کے دور میں نواب شاہ ٹریفک حادثے کے متاثرین کیلئے حکومت سندھ کی جانب سے معاوضے کی رقم اونٹ کے منہ میں زیرے کے مترادف ہے ۔ انہوں نے کہاکہ نواب شاہ میں اسکول بس اور ڈمپر کے درمیان ہولناک ٹریفک حادثے کے ذمہ داروں کو تاحال گرفتارنہیں کیا گیا ہے جس کے باعث عوام میں شدید بے چینی اور تشویش پائی جاتی ہے ۔ انہوں نے کہاکہ ایک جانب اس المناک ٹریفک حادثے کے ذمہ داروں کوقانون کے کٹہرے میں نہیں لایاگیا ہے جبکہ دوسری جانب حکومت سندھ کی جانب سے ٹریفک حادثے میں زخمی ہونے والے بچوں بہترعلاج ومعالجہ کی سہولیات فراہم نہیں کی جارہی ہیں۔ بابر غوری ، ڈاکٹر فاروق ستار اور سید سرداراحمد نے حکومت سے مطالبہ کیا کہ نواب شاہ میں ٹریفک حادثے میں جاں بحق ہونے والوں کے لواحقین کوفوری طورپر فی کس 50 لاکھ روپے معاوضہ ادا کیاجائے اور حادثے کے ذمہ داروں کے خلاف سخت ترین قانونی کارروائی کی جائے۔