رابطہ کمیٹی کے ڈپٹی کنوینر خالد مقبول صدیقی، رابطہ کمیٹی کے اراکین نے جشن عید میلاد النبیؐ کے موقع پر شہر میں نکلنے والے جلوسوں کی گزرگاہوں پر لگائے گئے ایم کیوایم کے مرکزی استقبالیہ کیمپوں کا دورہ کیا اور انتظامات کا جائزہ لیا

کراچی ۔۔۔14، جنوری 2014ء 

متحدہ قومی موومنٹ کی رابطہ کمیٹی کے ڈپٹی کنوینر زڈاکٹر خالد مقبول صدیقی ، رابطہ کمیٹی کے اراکین ڈاکٹر صغیر احمد ، عادل خان احمد سلیم صدیقی، کیف الوریٰ ،سید شاکر علی، رشید گوڈیل اور عبدالحسیب نے جشن عید میلا د النبیؐ کے موقع پرشہر میں نکلنے والے جلوسوں کی گزرگاہوں پر لگائے گئے ایم کیوایم کے استقبالیہ اور طبی کیمپوں کا دورہ کیا اور جلوسوں کی گزرگاہوں پر کئے گئے انتظامات کا جائزہ لیا۔ اس موقع پر حق پرست ارکان قومی وصوبائی اسمبلی اور ایم کیوایم علماء کمیٹی کے اراکین کے ہمراہ تھے ۔ رابطہ کمیٹی اراکین ،ایم کیوایم کی جانب سے بہادر آبادچورنگی ، تین ہٹی اور نمائش چورنگی پر لگائے گئے مرکزی استقبالیہ کیمپوں پر گئے جہاں انہوں نے استقبالیہ کیمپوں سے جلوسوں کے شرکاء کا خیر مقدم کیا اور انہیں قائد تحریک جناب الطاف حسین کی جانب سے جشن عید میلا د النبیؐ کی مبارکباد پیش کی ۔ رابطہ کمیٹی نے استقبالیہ اور طبی کیمپوں پر خدمات انجام دینے والے ایم کیوایم کے کارکنان اور خدمت خلق فاؤنڈیشن کے رضاکاروں کو زبردست خراج تحسین پیش کیا اور کہاکہ جشن عید میلا د النبیؐ پر عاشقانِ رسولؐ کی جتنی خدمت کی جائے اور سہولیات فراہم کی جائے وہ کم ہے ۔ رابطہ کمیٹی نے کہاکہ 12ربیع الاول مقدس اور بابرکت دن ہے اوراللہ تعالیٰ اس دن کی رحمتوں اور برکتوں سے سب کو منور فرمائے۔