پاکستان پیپلزپارٹی صوبائی اسمبلی حلقہ پی ایس 128 کے سابق صدر احسان اللہ شاہ شیرازی کا سینکڑوں ساتھیوں کے ہمراہ ایم کیوایم میں شمولیت کا اعلان

کراچی ۔۔۔13، جنوری 2014ء 

صوبائی اسمبلی کے حلقہ پی ایس 128ء سے تعلق رکھنے والے پاکستان پیپلزپارٹی کے سابق صدر احسان اللہ شاہ شیرازی نے اپنے سینکڑوں ساتھیوں کے ہمراہ قائد تحریک جناب الطاف حسین کے حق پرستانہ نظریہ اور فکر و فلسفہ سے متاثر ہو کر ایم کیوایم میں شمولیت کا اعلان کیا ہے۔ یہ اعلان انہوں نے گزشتہ روز خورشید بیگم سیکریٹریٹ عزیز آباد میں ایم کیوایم کی رابطہ کمیٹی کے ڈپٹی کنونیر ڈاکٹر خالد مقبول صدیقی اور رکن رابطہ کمیٹی اسلم شاہ آفریدی سے ملاقات کے موقع پر کیا۔ اس مو قع پر ایم کیوایم ہزارہ آرگنائزنگ (کراچی) کے انچارج شکیل عباسی ، جوائنٹ انچارج و حق پرست رکن صوبائی اسمبلی وقار شاہ و دیگر ذمہ داران بھی موجود تھے۔ملاقات میں ڈاکٹر خالد مقبول صدیقی نے احسان اللہ شاہ شیرازی سمیت دیگر افراد کی شمولیت کا زبردست خیر مقدم کیا اور ان کی شمولیت کو مظلوم عوام کے حقوق کے حصول کی جدوجہد کیلئے اہم سنگ میل قراردیا ۔ انہوں نے کہا کہ قائد تحریک جناب الطاف حسین ملک میں رائج فرسودہ جاگیردارانہ اوروڈیرانہ نظام کے خاتمے کی عملی جد دجہد کررہے ہیں اور تمام تر سازشوں اور منفی پروپیگنڈوں کے باوجود ایم کیوایم کا فکرو فلسفہ آج پاکستان کے گوشے گوشے میں پھیل رہاہے اور اب وہ دن دور نہیں جب غریب و متوسط طبقے کا انقلاب ملک کا مقدر بنے گا۔ایم کیوایم میں شمولیت کا اعلان کرنے والے احسان اللہ شیرازی نے اپنے جذبات کااظہار کرتے ہوئے کہا کہ ہزارے وال عوام اب جان چکے ہیں کہ قائد تحریک جناب الطاف حسین ہی واحد لیڈر ہیں جو انکے مسائل کو حل کر سکتے ہیں اور جناب الطاف حسین ہی ملک کی مظلوم قومیتوں سمیت ہزارے وال قوم کے نجات دھندہ ہیں۔