ماہ ربیع الاول اور جشن عید میلاد النبیؐ کے موقع پر شہر میں قیام امن اور تمام مسالک کے عوام کے درمیان فرقہ وارانہ ہم آہنگی کے فروغ کیلئے ایم کیوایم کی رابطہ کمیٹی کے اراکین کی مفتی رفیع عثمانی اور مفتی تقی عثمانی سے ملاقات
ربیع الاول مسلم امہ کے تمام مسالک کے ماننے والوں کیلئے احترام کا مہینہ ہے، رابطہ کمیٹی اراکین
فرقہ واریت کے خلاف جناب الطاف حسین اور ایم کیوایم کا اہم اور عملی کردار ہے، مفتی رفیع عثمانی، مفتی تقی عثمانی کی رابطہ کمیٹی سے گفتگو
کراچی ۔۔۔12، جنوری 2014ء
ماہ ربیع الاول اور جشن عید میلاد النبیؐ کے موقع پر شہر میں قیام امن اور تمام مسالک فکر کے عوام کے درمیان فرقہ وارانہ ہم آہنگی برقرار رکھنے کیلئے متحدہ قومی موومنٹ کی رابطہ کمیٹی کے اراکین احمد سلیم صدیقی ، خالد سلطان، عبد الحسیب، عادل خان اور رشید گوڈیل نے دیو بند مکتب فکر کے دارالعلوم واقع کورنگی میں وفاق المدارس پاکستان کے سربراہ مفتی رفیع عثمانی اور مفتی تقی عثمانی سے ملاقات کی اور انہیں قائد تحریک جناب الطاف حسین کا پیغام پہچایا ۔ اس موقع پر ایم کیوایم کے رکن قومی اسمبلی علی عابدی، حق پرست رکن سندھ اسمبلی انور رضا اور ایم کیوایم علماء کمیٹی کے اراکین بھی موجود تھے۔ ملاقات میں رابطہ کمیٹی کے اراکین نے مفتی رفیع عثمانی اور مفتی تقی عثمانی سے گفتگو کرتے ہوئے کہا کہ ربیع الاول مسلم امہ کے تمام مسالک کے ماننے والوں کیلئے احترام کا مہینہ ہے اور حضرت محمد مصطفیؐ سے عقیدت و محبت کا تقاضہ ہے کہ تمام مسالک کے علمائے کرام اور عوام اس مہینے کا تقدس اور احترام ہر قیمت پر برقرار رکھیں۔ رابطہ کمیٹی کے اراکین نے مفتی رفیع عثمانی اور مفتی تقی عثمانی کو جشن عید میلا د النبیؐ کی دلی مبارکباد بھی پیش کی ۔ اس موقع پر مفتی رفیع عثمانی اور مفتی تقی عثمانی نے رابطہ کمیٹی کے اراکین سے گفتگو کرتے ہوئے کہاکہ مسلم امہ کے تمام مکاتب فکر کے درمیان فرقہ وارانہ ہم آہنگی موجود ہے تاہم اس کے باوجود جو عناصر سازش کے تحت مسلم امہ کے مسالک کو فرقہ واریت کی آگ میں جھونکنے کی کوشش کرتے ہیں ان کے خلاف جناب الطاف حسین اور ایم کیوایم کا اہم اور عملی کردار ہے ۔علمائے کرام نے کہاکہ جناب الطاف حسین اور ایم کیوایم کی جانب سے تمام مسالک کے عوام کے درمیان فرقہ وارانہ ہم آہنگی کیلیئے جو قابل ستائش کوشش ہمیشہ کی جاتی رہی ہیں اسے مد نظر رکھتے ہوئے ایسا محسوس ہوتا ہے کہ ایم کیوایم کے خلاف منظم پروپیگنڈے کرکے اس کی شکل بگاڑی جارہی ہے ۔ ملاقات میں رابطہ کمیٹی کے اراکین اور علمائے کرام کے درمیان باہمی رابطے برقرار رکھنے پر زور اور اس پر اتفاق کیا گیا اور قائد تحریک جناب الطاف حسین کی درازی عمر، صحت و تندرستی اور عافیت کیلئے خصوصی دعا بھی کی گئی۔