پشاور کے علاقے بڈھ بیر میں گاڑی پر دہشت گردوں کی اندھا دھند فائرنگ کے نتیجے میں اے این پی کے رہنما میاں مشتاق سمیت تین افراد کی شہادت پر جناب الطاف حسین کا اظہار مذمت

لندن۔۔۔12، جنوری 2014ء

متحدہ قومی موومنٹ کے قائد جناب الطاف حسین نے پشاور کے علاقے بڈھ بیر میں دہشت گردوں کی جانب سے گاڑی پر اندھا دھند فائرنگ کی شدید مذمت کی ہے اور فائرنگ کے نتیجے میں عوامی نیشنل پارٹی کے رہنما میاں مشاق سمیت 3افراد کی شہادت پر گہرے دکھ اور افسوس کا اظہار کیا ہے۔ ایک بیان میں انہوں نے کہا کہ معصوم و بے گناہ انسانوں کا بلاتفریق خون بہانے والے دہشت گرد اب درندگی پر اترے ہوئے ہیں اور سیاسی رہنماؤں کو دھماکوں اور فائرنگ کا نشانہ بناکر اپنی وحشت اور بربریت کے ذریعے ان کو خوفزدہ کرنا چاہتے ہیں جس کی جتنی بھی مذمت کی جائے کم ہے ۔ انہوں نے کہاکہ ملک کی تمام سیاسی و مذہبی جماعتوں کو اب دہشت گردی اور انتہاء پسندی کے خلاف کھل کر سامنے آنا ہوگا اور اس عفریت سے نجات پانے کیلئے متحد و منظم ہوکر جدوجہد کرنا ناگزیر ہوچکا ہے ۔ انہوں نے فائرنگ کے نتیجے میں عوامی نیشنل پارٹی کے رہنما میاں مشتاق سمیت 3افراد کی شہادت پر گہرے دکھ اورا فسوس کا اظہار کیا اور شہداء کے سوگوار لواحقین اورعوامی نیشنل پارٹی کے رہنماؤں و کارکنوں سے دلی تعزیت وہمدردی کااظہار کرتے ہوئے شہداء کے بلند درجات کیلئے دعا بھی کی ۔ جناب الطاف حسین نے صدر مملکت ممنون حسین، وزیراعظم نواز شریف اور وفاقی وزیر داخلہ چوہدری نثار علی خان سے مطالبہ کیا کہ پشاور کے علاقے بڈھ بیر میں عوامی نیشنل پارٹی کے رہنما ء میاں مشتاق سمیت 3افراد کو فائرنگ کرکے بیدردی سے قتل کرنے میں ملوث سفاک دہشت گردوں کو فی الفور گرفتار کیاجائے اور انہیں عبرتناک سزا دی جائے۔