مسلم لیگ (ن) کے رہنما امیر مقام کے قافلے کو بم دھماکوں سے نشانہ بنانے پر الطاف حسین کا اظہار مذمت

لندن۔۔۔12، جنوری 2014ء 

متحدہ قومی موومنٹ کے قائد جناب الطاف حسین نے دہشت گردوں کی جانب سے مسلم لیگ (ن) کے رہنما امیر مقام کے قافلے بم دھماکوں سے نشانہ بنانے کی سخت ترین الفاظ میں مذمت کی ہے اور بم دھماکوں کے نتیجے میں سیکورٹی پر مامور پولیس اہلکاروں کے شہید اور متعدد کے زخمی ہونے پر گہرے دکھ اور افسوس کااظہار کیا ہے ۔ ایک بیان میں انہوں نے کہاکہ سفاک دہشت گرد ملک کی سالمیت کے درپے ہیں اور مسلح افواج ، سیکورٹی فورسیز اور عوام کوکھلی دہشت گردی کا نشانہ بنا رہے ہیں ایسی سنگین صورتحال تمام سیاسی ومذہبی جماعتوں اور ان کے رہنماؤں کو متحد و منظم ہوکر دہشت گردی کے خلاف نبرد آزما ہونے کا عندیہ دے رہی ہے ۔ انہو ں نے بم دھماکوں میں شہید پولیس اہلکاروں کے سوگوار لواحقین سے دلی تعزیت وہمدردی کااظہار کرتے ہوئے انہیں صبر کی تلقین اور دعا کی کہ اللہ تعالیٰ شہید اہلکاروں کو جنت الفردوس میں اعلیٰ مقام عطا فرمائے اور زخمی پولیس اہلکاروں کو جلد و مکمل صحت و تندرستی عطا کرے ۔ جناب الطاف حسین نے صدر مملکت ممنون حسین ، وزیراعظم نواز شریف اور وفاقی وزیر داخلہ چوہدری نثار علی خان سے مطالبہ کیا کہ مسلم لیگ ن کے رہنما امیر مقام کے قافلے پر بم دھماکوں کا سختی سے نوٹس لیاجائے اور اس میں ملوث سفاک دہشت گردوں کو گرفتار کرکے قرار واقعی سزا دی جائے ۔