سندھ دھرتی کے مستقل باشندوں کے جائز حقوق کی آواز بلند کرنے پر قادر مگسی سیخ پا ہیں ، سندھ تنظیمی کمیٹی ایم کیوایم

کراچی ۔۔۔11، جنوری 2014ء 

متحدہ قومی موومنٹ سندھ تنظیمی کمیٹی کے انچارج عمر قریشی اور اراکین نے نام نہاد قوم پرست رہنما قادر مگسی کی جانب سے قائد تحریک جناب الطاف حسین کے خلاف بے بنیاد ہرزہ سرائی کی سخت ترین الفاظ میں مذمت کی ہے اور کہا ہے کہ جناب الطاف حسین کی جانب سے سندھ کے مستقبل باشندوں کے حقوق کے حصول کی آواز بلند کرنے پر قادر مگسی سیخ پا ہیں جس سے اندازہ لگایا جاتا ہے کہ نام نہاد قوم پرست سندھی دھرتی کا دم تو بھرتے ہیں لیکن انہیں سندھ کے مستقل باشندوں کے حقوق اور سندھ کی وحدت سے بھی کوئی سروکار نہیں ہے۔ اپنے مشترکہ بیان میں انہوں نے کہاکہ اپنے آپ کوہزاروں برسوں سے سندھ دھرتی کا وارث قرار دے کر قادر مگسی اور ان جیسے نام نہاد قوم پرست رہنما زمینی اور تاریخی حقائق کو تبدیل نہیں کرسکتے اور نہ ہی اس طرح کے دھمکی آمیز بیانات دیکر سندھ کے مستقل باشندوں کو ان کے جائز حقوق کی جدوجہد سے باز رکھا جاسکتا ہے ۔انہوں نے کہاکہ قائد تحریک جناب الطاف حسین سندھ دھرتی کے سچے اور بہادر سپوت ہیں اور سندھ دھرتی کے وہ نام نہادبیٹے جو اپنے آپ کو سندھ دھرتی کا وارث قرار دیتے ہیں وہ پھر بھی وسائل اور اختیارات میں آدھی سے زیادہ سندھ دھرتی کی آبادی کے جائزحقوق پر قابض رہنا چاہتے ہیں اور اس کا حق مار کر سندھ کو تقسیم کی جانب لیجانا چاہتے ہیں۔سندھ تنظیمی کمیٹی کے انچارج و اراکین نے کہا کہ سندھ دھرتی پر بسنے والی مختلف قومیتوں کے لوگ جناب الطاف حسین کے ساتھ ہیں اور اب نام نہاد قوم پرست رہنما دوغلی اور منافقانہ سیاست کے ذریعے نہ تو سندھ دھرتی کے عوام کو بیوقوف بنا سکتے ہیں اور نہ ہی سندھ کی آدھی سے زیادہ آبادی کے جائز حقوق پر ’’لڑاؤ اور حکومت کرو‘‘ کی سازش کے تحت قابض رہ سکتے ہیں ۔