ایم کیو ایم اقتدار میں آکر پورے ملک میں تعلیمی اداروں کا نیٹ ورک قائم کریگی،رکن رابطہ کمیٹی سید امین الحق

کراچی۔۔۔11جنوری 2014ء

متحدہ قومی موومنٹ کی رابطہ کمیٹی کے رکن سید امین الحق نے حق پرست رکن قومی اسمبلی سفیان یوسف اور رکن سندھ اسمبلی ریحان ظفر کے فنڈز سے ناظم آباد نمبر 3میں واقع گورنمنٹ گرلز پائلٹ ہائر سیکنڈری اسکول میں سائنس کی نئی کلاسوں کا افتتاح اور دوبارہ تعمیر ہونے والے بلاک کی مکمل تزئین و آرائش کے کاموں کا سنگ بنیاد رکھ دیا۔اس موقع پر اسکول کی پرنسپل محترمہ سیدہ حمیرہ زرین ،اساتذہ کرام،انتظامیہ اور طالبات کی بڑی تعداد موجود تھی۔سنگ بنیا د کی تقریب سے خطاب کرتے ہوئے رکن رابطہ کمیٹی سید امین الحق نے کہا کہ ایم کیو ایم اقتدار میں آکر پورے ملک میں تعلیمی اداروں کا نیٹ ورک قائم کریگی تاکہ ان تعلیمی اداروں سے ڈاکٹر قدیر خان جیسے سائنسدان اور قائد تحریک جناب الطاف حسین جیسے رہنماء پیدا ہوکر قوم کی خدمت کرسکیں اور ملک کا نام روشن کرسکیں۔انہوں نے کہا کہ مجھے بیحد خوشی ہوئی کہ اس اسکول کی طالبات نصابی سرگرمیوں کے ساتھ ساتھ غیرنصابی سرگرمیوں میں بھی آگے ہیں ،ایم کیو ایم کی یہ کوشش رہی ہے کہ وہ طالبات کو بہتر سے بہتر مواقع دلائے تاکہ وہ اپنی صلاحیتوں کا لوہا منواسکیں۔ انہوں نے کہا کہ ملک میں تعلیمی بجٹ 2.2فیصد ہے لیکن ایم کیو ایم کی یہ کوشش ہے کہ ہم اس بجٹ کو 5فیصد تک کرائیں،تعلیمی اداروں میں میرٹ کو ملحوظ خاطر رکھیں تاکہ ہمارا نظام تعلیم اور معیار تعلیم بہتر ہوسکے۔انہوں نے کہا کہ کسی بھی قوم کے نوجوانوں کو تباہ کرنا ہے تو اس قوم کو نقل میں لگادیا جائے ،ایم کیوا یم کراچی سمیت ملک بھر میں نقل کے رجحان کے خاتمہ کے لیے کوشاں ہے،کراچی کا لٹریسی ریٹ 60فیصد ہے ایم کیو ایم کی کوشش ہے کہ اسے 80سے 90فیصد پر لایا جائے اور یہ اساتذہ کرام اور والدین کے بغیر ممکن نہیں۔اس موقع پر ممبر قومی اسمبلی سفیان یوسف نے کہا کہ طلبہ کی ذمہ داری ہے کہ وہ اپنے اندر خوداعتمادی پیدا کریں بہتر تعلیم حاصل کریں تاکہ والدین اور ملک و قوم کا نام روشن کرسکیں۔رکن سندھ اسمبلی ریحان ظفر نے کہا کہ حق پرست قیادت نے آج اپنا ایک اور وعدہ پورا کیا ہے مجھے خوشی ہے ہمارے اس اسکول کی طالبات اعلیٰ نمبرز حاصل کرکے اپنا اسکول کا نام روشن کررہی ہیں۔دریں اثناء رکن رابطہ کمیٹی سیدامین الحق اور ارکان اسمبلی گورنمنٹ گرلز پائلٹ ہائر سیکنڈری اسکول پہنچے تو طالبات پر مشتمل بینڈ نے مختلف دھن بجاکر مہمانوں کا استقبال کیا اور پرنسپل محترمہ سیدہ حمیرہ زرین کی جانب سے پھولوں کے گلدستہ پیش کیئے گئے۔