چوہدری اسلم کی شہات پاکستان کانقصان ہے ۔الطاف حسین

لندن ۔۔۔۔9 جنوری 2014ء

متحدہ قومی موومنٹ کے قائدجناب الطاف حسین نے ایس ایس پی سی آئی ڈی چوہدری اسلم کے قافلے پر خودکش بم حملے کی شدیدالفاظ میں مذمت کی ہے اوردہشت گردی کے واقعہ میں پولیس کے سینئر،بہادراورنڈرافسرچوہدری اسلم کی شہادت پر دلی صدمہ اورگہرے رنج وغم کااظہارکیاہے۔اپنے ایک بیان میں انہوں نے کہاکہ ایس ایس پی سی آئی ڈی چوہدری اسلم پاکستان میں دہشت گردی کابازارگرم کرنے والے کالعدم تنظیموں کے دہشت گردوں کے خلاف سرگرم تھے اورانہوں نے کالعدم تنظیموں کے دہشت گردوں اور دیگرجرائم پیشہ عناصرکے خلاف بڑ ی جرات و بہادری سے کارروائیاں کیں۔جناب الطاف حسین نے کہاکہ چوہدری اسلم کی شہادت سے کراچی پولیس ہی نہیں بلکہ پاکستان ایک انتہائی بہادر ، نڈراور جرات مند افسرسے محروم ہوگیا ہے اوریہ پاکستان کانقصان ہے ۔یہ ایک بڑاسانحہ ہے اورکراچی کے امن پسند باسی اس المناک سانحہ پرافسردہ اوراشکبار ہیں۔جناب الطاف حسین نے چوہدری اسلم کی شہادت پر ان کے تمام ساتھیوں،شہید کی بیوہ اورتمام لواحقین سے دلی تعزیت کااظہارکرتے ہوئے اس المناک سانحہ پر مجھ سمیت کراچی کے تمام شہری آپکے غم میں برابرکے شریک ہیں اوردعاگوہیں کہ اللہ تعالیٰ چوہدری اسلم شہید کی مغفرت فرمائے ، انہیں شہادت کادرجہ عطاکرے اورجنت الفردوس میں جگہ دے ۔ انہوں نے زخمیوں کی جلد صحتیابی کیلئے بھی دعا کی اوران سے ہمدردی کااظہارکیا۔ جناب الطاف حسین نے حکومت سے مطالبہ کیاکہ چوہدری اسلم کی شہادت کے المناک سانحہ میں ملوث دہشت گردوں کوفی الفور گرفتارکیاجائے اور جوسفاک دہشت گردپولیس وسیکوریٹی فورسز اورپاکستان کے معصوم شہریوں کے خون سے ہولی کھیل رہے ہیں ان دہشت گردوں کاقلع قمع کیاجائے ۔