ایم کیوایم رابطہ کمیٹی کے ڈپٹی کنوینر ندیم نصرت کے والد نصرت حسین کے انتقال کی خبر ملتے ہی رابطہ کمیٹی کے ڈپٹی کنوینرز اور اراکین رابطہ کمیٹی کراچی کے مقامی اسپتال اور مرحوم کی رہائشگاہ واقع گلشن اقبال پہنچ گئے

کراچی۔۔۔7جنوری2014ء

متحدہ قومی مومنٹ کے ڈپٹی کنوینر ندیم نصرت کے والد نصرت حسین کے انتقال کی خبر ملتے ہی ایم کیو ایم کی رابطہ کمیٹی کے ڈپٹی کنوینر ڈاکٹر خالد مقبول صدیقی، ناصر جمال و اراکین رابطہ کمیٹی، حق پرست ارکان اسمبلی، کراچی کے مقامی اسپتال اور گلشن اقبال میں واقع رہائشگاہ پہنچ گئے۔ انہوں نے مرحوم کے سوگواران سے ملاقات کی اور قائد تحریک جناب الطاف حسین کی جانب سے نصرت حسین کے انتقال پر تعزیت کی اور مرحوم کی مغفرت اور سوگواران کیلئے صبر جمیل کی دعا کی ۔ اس موقع پر نائن زیرو پر تنظیمی خدمات انجام دینے والے مختلف شعبہ جات کے ارکان ، کراچی کے مختلف سیکٹرز کے ذمہ داران و کارکنان بھی موجود تھے۔ 

دریں اثناء متحدہ قومی موومنٹ کی رابطہ کمیٹی نے ایم کیوایم رابطہ کمیٹی کے ڈپٹی کنوینر ندیم نصرت کے والد نصرت حسین کے انتقال پر گہرے دکھ اور افسوس کا اظہار کیا ہے۔ اپنے تعزیتی بیان میں رابطہ کمیٹی نے نصرت حسین کے تمام سوگوار لواحقین سے دلی تعزیت و ہمدردی کااظہار کرتے ہوئے دعا کی کہ اللہ تعالیٰ مرحوم کو اپنی جواررحمت میں اعلیٰ مقام عطافرمائے اور سو گوار لواحقین کو صبر جمیل عطا کرے۔(آمین)

علاوہ ازیں ایم کیو ایم کے مختلف شعبہ جات جن میں کراچی تنظیمی کمیٹی،مرکزی الیکشن سیل،سندھ تنظیمی کمیٹی ،کراچی مضافاتی آرگنائزنگ کمیٹی،آل پاکستان متحدہ اسٹوڈنٹس آرگنائزیشن ،صوبائی تنظیمی کمیٹی،لیبر ڈویژن ،میڈیکل ایڈ کمیٹی،شعبہ اطلاعات ،ایلڈرز ونگ ،متحدہ بین المسلمین،اقلیتی امور،لیگل ایڈ کمیٹی،متحدہ علماء کمیٹی ودیگر شعبہ جات اور ونگز نے بھی ڈپٹی کنوینر ندیم نصرت کے والد نصرت حسین کے انتقال پر دلی افسوس کا اظہارکر تے ہوئے مرحوم کی مغفرت اور سو گواران کے لئے صبر جمیل کے لئے دعا کی ۔

مرحوم کی نماز جنازہ مورخہ 8؍ جنوری 2014ء بروز بدھ ، بعد نماز ظہرمسجد بیت المکرم گلشن اقبال میں بعد نماز ظہر ادا کی جائے گی۔