جو عناصر سندھ کے عوام کو آپس میں لڑانے کیلئے اشتعال انگیزی کررہے ہیں وہ سندھ اوراس کے عوام کے دوست نہیں ہیں۔ الطاف حسین

لندن ۔۔۔4 جنوری 2014ء

متحدہ قومی موومنٹ کے قائدجناب الطاف حسین نے کہاہے کہ کراچی سے کشمورتک تمام حق پرست سندھی، مہاجر، پنجابی، پختون ، بلوچ، سرائیکی، کشمیری، گلگتی، بلتستانی سمیت تمام زبانیں بولنے والے عوام ایم کیوایم کے ساتھ ہیں اورجوعناصرسندھ کے عوام کوآپس میں لڑانے کیلئے اشتعال انگیزی کررہے ہیں اور نفرتوں پر مبنی پروپیگنڈے کررہے ہیں وہ کسی بھی طرح صوبہ سندھ اوراس کے عوام کے دوست نہیں ہیں۔ انہوں نے یہ بات الہ دین پارک گراؤنڈ گلشن اقبال میں 5جنوری کوہونے والے جلسہ عام کی تیاریوں میں مصروف کارکنوں سے فون پر گفتگو کرتے ہوئے کہی۔ انہوں نے کہا کہ سندھ کی دھرتی محبتوں کی دھرتی ہے لیکن وہ عناصرجوسندھ دشمنوں کے ایجنٹ ہیں وہ حقوق کی آوازبلندکرنے پر ایم کیوایم کے خلاف زہریلے پروپیگنڈے کررہے ہیں اوراشتعال پھیلارہے ہیں۔عوام ایسے عناصر کواچھی طرح سمجھتے ہیں اورانہیں باربارمستردکرتے آئے ہیں۔ جناب الطا ف حسین نے کہاکہ ایم کیوایم تمام مظلوموں کی تحریک ہے اوراس تحریک کی کامیابی کاپھل ہر مظلوم کھائے گا خواہ اس کا تعلق کسی بھی قومیت، رنگ، نسل، زبان،مذہب، فقہ یامسلک سے کیوں نہ ہو۔انہوں نے تمام ترخطرات کے باوجود بھوک پیاس کی پرواہ کئے بغیر گلشن اقبال میں اتوار5 جنوری کے جلسہ عام کے انتظامات میں مصروف ایم کیوایم کے کارکنوں، بزرگوں اورخواتین کوزبردست خراج تحسین پیش کیا۔