شرجیل میمن نے مجھ پر بھارتی شہری ہونے کا جو گھناؤنا اور جھوٹا الزام لگایا ہے اس سے مجھے شدید صدمہ پہنچا ہے۔ محمد انور رکن رابطہ کمیٹی ایم کیوایم

لندن ۔۔۔4 جنوری 2014ء

متحدہ قومی موومنٹ کی رابطہ کمیٹی کے سینئر رکن محمد انور نے کہا ہے کہ سندھ کے وزیر اطلاعات شرجیل انعام میمن نے مجھ پر بھارتی شہری ہونے کا جو گھناؤنا اور جھوٹا الزام لگایا ہے اس سے مجھے شدید صدمہ پہنچا ہے اور میں ان سے مطالبہ کرتا ہوں کہ وہ اپنے بیان کوواپس لیں۔ اپنے ایک بیان میں محمدانورنے کہاکہ شرجیل انعام میمن کا یہ الزام حقائق کے سراسر منافی ہے اور اصل حقیقت یہ ہے کہ میں نہ تو کبھی بھارتی شہری رہا ہوں اور نہ ہی اب ہوں۔ محمد انور نے کہا کہ میں مشرقی پاکستان میں پیدا ہوا اور میں 1970ء میں ایک پاکستانی کی حیثیت سے تعلیم کے حصول کیلئے برطانیہ آیا۔ سقوط ڈھاکہ کے بعد بھی میں نے کبھی اپنی پاکستانی شہریت ترک نہیں کی اوربرطانیہ کے ساتھ ساتھ اپنی پاکستانی شہریت بھی ہمیشہ برقرار رکھی۔ محمد انور نے کہا کہ میرے والد ین نے قیام پاکستان کی تحریک میں بھی بڑھ چڑھ کرحصہ لیا اور1947 ء میں قیام پاکستان کے بعد مشرقی پاکستان ہجرت کی جہاں میرے والدمحمدمغنی انصاری مرحوم نے انتھک جدوجہد کے بعد ایک کامیاب کاروبار قائم کیا۔ جب سقوط ڈھاکہ سے قبل غیربنگالیوں کیلئے حالات خراب ہونے شروع ہوئے تب بھی میرے والد اور میرے خاندان نے کھل کر پاکستان اور پاکستانی فوج کاساتھ دیا۔ میرے والد نے تمام ترمشکلات کے باوجود پاکستان کی مسلح افواج کے اعلیٰ حکام سے رابطہ میں رہ کر فوج کا ہرممکنہ طریقہ سے ساتھ دیا۔ محمد انور نے کہاکہ یہ بات ریکارڈ پر ہے کہ جب سابقہ مشرقی پاکستان میں غذائی اجناس فراہم کرنے والی تمام کمپنیوں نے پاکستانی فوج کوفوڈسپلائی بندکردی تھی تومیرے والد نے پاکستانی فوج کوغذائی اجناس فراہم کرنے کیلئے ایک کمپنی تشکیل دی جو سقوط ڈھاکہ کے دن تک پاک فوج کی مغربی بنگال رجمنٹ کوغذائی اجناس فراہم کرتی رہی اورمحض اس ذمہ داری کی وجہ سے میرے والد مغربی پاکستان ہجرت نہ کرسکے۔محمدانور نے کہاکہ افواج پاکستان کی مددواعانت کرنے کے جرم میں نئے قائم شدہ بنگلہ دیش کی حکومت نے میرے والد مغنی انصاری کو گرفتار کرکے war collaborator کا الزام لگا کر ان پر نہ صرف جنگی جرائم کامقدمہ چلایا بلکہ انہیں سزابھی دی گئی۔ میرے والد نے اپنی سزا پوری کی اور رہائی کے بعد انہوں نے بنگلہ دیش میں رہنے سے انکارکرکے اپنامکان اورکاروبارسب کچھ چھوڑ کر مغربی پاکستان ہجرت کی۔محمدانور نے کہاکہ پاکستان اور افواج پاکستان کیلئے گراں قدر خدمات انجام دینے پر میرے والد کو14 اگست 1967ء کو حکومت پاکستان کی جانب سے تمغہء خدمت سے بھی نوازاگیا۔محمدانور نے کہاکہ میں یہ مختصر تفصیل بتانا اسلئے ضروری سمجھتا ہوں کہ مجھ پر بھارتی شہری ہونے کا گھناؤنا الزام لگایا گیا اور بھاری شہری یا بھارتی ایجنٹ ہونے کی ناپاک سازش کی گئی ہے۔ میں شرجیل میمن کے اس انتہائی لغو اور جھوٹے الزام کی مذمت کرتاہوں اوران سے مطالبہ کرتاہوں کہ وہ اپنے الفاظ واپس لیں ورنہ انہیں عدالت کے روبرو اپنے الزام کی سچائی ثابت کرنے کیلئے پیش ہونا پڑے گا۔