حق پرست رکن سندھ اسمبلی ارشد ووہرا کی گاڑ ی پر دہشت گردوں کے دستی بم سے حملے پر الطاف حسین کااظہار مذمت
ارشد ووہرا کی گاڑی پر دستی بم سے حملہ بزدلانہ اور بلدیاتی انتخابات کے موقع پر خوف و ہراس پھیلانے کی مذموم کارروائی ہے ، الطاف حسین
ایم کیوایم نے کل سے اپنی بلدیاتی انتخابی مہم کا آغاز کیا اور 24گھنٹے کے دوران ہی دہشت گردوں نے ارشد ووہرا کی گاڑی پر دستی بم سے حملہ کردیا، الطاف حسین
وزیراعظم ، وفاقی وزیر داخلہ اور وزیراعلیٰ سندھ ملوث دہشت گردوں کو فی الفور گرفتار کریں ، الطاف حسین
لندن ۔۔۔31، دسمبر2013ء
متحدہ قومی موومنٹ کے قائد جناب الطا ف حسین نے حق پرست رکن سندھ اسمبلی ارشد ووہرا کی گاڑی پر دہشت گردوں کے دستی بم سے حملے کی سخت ترین الفاظ میں مذمت کی ہے اور اسے بزدلانہ اور بلدیاتی انتخابات کے موقع پر خوف و ہراس پھیلانے کی مذموم کارروائی قرار دیا ہے ۔ ایک بیان میں انہوں نے کہا کہ شہر میں جاری ٹارگٹڈ آپریشن کے باوجود ارشدووہرا کی گاڑی پر دستی بم سے حملہ یہ ثابت کرنے کیلئے کافی ہے کہ شہر میں امن کے دشمن دہشت گرد اب بھی قانو ن کی گرفت سے محفو ظ ہیں ۔ انہوں نے کہا کہ ایم کیوایم نے کل 30دسمبر سے اپنی بلدیاتی انتخابی مہم کا آغاز کیا اور 24گھنٹے کے دوران ہی دہشت گردوں نے حق پرست رکن سندھ اسمبلی ارشد ووہرا کی گاڑی پر دستی بم سے حملہ کردیاجس کی جتنی بھی مذمت کی جائے وہ کم ہے ۔جناب الطاف حسین نے وزیراعظم نواز شریف ، وفاقی وزیر داخلہ چوہدری نثا رعلی خان اور وزیراعلیٰ سندھ سید قائم علی شاہ سے مطالبہ کیا کہ حق پرست رکن سندھ اسمبلی ارشد ووہرا کی گاڑی پر دستی بم سے حملے میں ملوث دہشت گردوں کو فی الفور گرفتار کیاجائے اور انہیں قرار واقعی سزا دی جائے ۔