ممتاز شیعہ رہنماء مرزا یوسف حسین کی گاڑی پر فائرنگ اور واقعے میں دو افراد کی ہلاکت پر ایم کیوایم رابطہ کمیٹی کا اظہار مذمت

کراچی۔۔۔28دسمبر2013ء 

متحدہ قومی موومنٹ کی رابطہ کمیٹی نے مسلح دہشت گردوں کی جانب سے گلستان جوہر میں ممتاز شیعہ رہنماء مرزا یوسف حسین کی گاڑی پر فائرنگ کی سخت ترین الفاظ میں مذمت کی ہے اور واقعہ میں ایک پولیس اہلکار اور ذاتی محافظ کے جاں بحق اور ایک پولیس اہلکار کے زخمی ہونے پر گہرے دکھ اوافسوس کا ظہار کیا ہے اور واقعہ کو شہر کے پرامن ماحول کو خراب کرنے کی گھناؤنی سازش قرار دیا ہے۔ ایک بیان میں رابطہ کمیٹی نے کہا کہ ایک سوچھی سمجھی سازش کے تحت ایک مسلک سے تعلق رکھنے والے افراد کو مسلسل نشانہ بنایا جارہا ہے جس کی جتنی بھی مذمت کی جائے کم ہے۔ انہوں نے جاں بحق ہونے والے افراد کے سو گوار لواحقین سے دلی تعزیت وہمدردی اظہار کرتے ہوئے انہیں صبر کی تلقین۔ رابطہ کمیٹی نے حکومت سندھ سے مطالبہ کیا ہے کہ مرزایوسف حسین کی گاڑی پر فائرنگ کا نوٹس لیا جائے اور اس میں ملوث دہشت گردوں کے گرفتا رکرکے قرار واقعی سزا دی جائے۔