کراچی ،حیدرآبادسمیت ملک بھرمیں گیس کی لوڈشیڈنگ اور پریشر میں کمی ختم کرکے گیس پریشر مزید بڑھایاجائے ، ارکان سندھ اسمبلی ایم کیوایم

کراچی ۔۔۔27، دسمبر2013ء 

متحدہ قومی موومنٹ کے ارکان سندھ اسمبلی نے کراچی ،حیدرآبادسمیت ملک بھرمیں گھریلو صارفین کیلئے سوئی گیس کی لوڈشیڈنگ اور پریشر میں کمی کے باعث گھریلو صارفین کو لاحق شدید مشکلات اور پریشانیوں پر گہری تشویش کا اظہار کیا ہے ۔ اپنے مشترکہ بیان میں انہوں نے کہا کہ عوام پہلے ہی بجلی کی لوڈشیڈنگ ، پانی کی عدم فراہمی ، بے روزگاری سمیت دیگر بنیادی مسائل جھیل رہے ہیں اور اب شہر میں گھریلو صارفین کیلئے گیس کی لوڈشیڈنگ اور پریشر کی کمی نے شہریوں کو مزید عذاب میں مبتلا کردیا ہے جس کی جتنی بھی مذمت کی جائے کم ہے ۔ انہوں نے کہا کہ گھروں میں گیس کی لوڈشیڈنگ اور پریشر کمی کے سبب تمام طبقہ ہائے زندگی سے تعلق رکھنے والے افراد اورباالخصوص خواتین کے روز مرہ کے معمولات زندگی بری طرح سے متاثر ہورہے ہیں جبکہ عوام کے گھریلو بجٹ میں بے پنہاں اضافہ ہوگیا ہے اور وہ لکڑی ، کوئلہ اور مٹی کا تیل استعمال کررہے ہیں جس سے ایسا محسوس ہوتا ہے کہ شہری عوام مزید نصف صدی پیچھے چلے گئے ہیں۔ حق پرست ارکان سندھ اسمبلی نے وزیراعظم نواز شریف ،وفاقی وزیرپیٹرولیم وقدرتی وسائل اور وزیراعلیٰ سندھ سید قائم علی شاہ سے مطالبہ کیا کہ کراچی سمیت ملک بھرکے گھریلو صارفین پر سوئی گیس کی لوڈشیڈنگ اور پریشر میں کمی کا عذاب مسلط کرنے کا سختی سے نوٹس لیاجائے اور گیس کی لوڈشیڈنگ اور پریشر کی کمی کا ظالمانہ اقدام ختم کراکر گیس کے پریشر مزید بڑھایاجائے ۔